Manipur buaina avanga zohnahthlak tam tak, raltlana awm te tlawh leh chhawmdawlna te pe turin BCM Relief Team te an kal. BCM Relief Team te hi Rev. L. Vanlalsanga, Director-in kaihruaiin, Pu Lalrinawma, Coordinator, R&D, Pu B. Malsawmkima leh Pu H. Lalrinpuia, BCM Hqrs.Office-a thawktute an ni. June ni 5 khan BCM Hqrs. Serkawn chhuahsanin Aizawl-ah an riak a, Aizawlah hian tanpuina tur mamawh te an lam khawm nghal a. June 6 (Nilaini) zing-ah Baptist Multipurpose Centre, Falkland, Aizawl-ah Kohhran hoten thlahin, Executive Secrcetary - Rev. R. Lalrintluanga’n kaihruaiin, Rev. :L. Vanlalsanga, Director, BCM R&D-in Tanpuina pek tum dan leh an kal chhan te sawifiahin Rev. C. Lalhungliana'n tawngtaina a neih hnuah, Kohhran hoten an vai liam ta a ni.  BCM Relief Team te hian tanpuina cheng nuai 8 man hu - ei leh In tur bakah  mamawh hrang hrang Truck Trip khat nen an kal a ni.

Ruahman ang chuan June 7 leh 8 ah Manipur-ah hian chamin, a theih ang angin Relief Camp te an tlawh hnu-ah, June 9 ah Manipur chhuahsanin Mizoram panin an lo haw leh ang. Tanpuina thilpek an ken hi Baptist Church of Mzoram (BCM) leh Council of Baptist Churches in North East India (CBCNEI) ten Manipur Zohnahthlakte tanpuina atana fund an thawh cheng nuai 8 hmanga lam khawm a ni.