Mizoram Baptist Mipa Pawl (MBMP) chuan June ni 17 (Thawhtanni) kha MBMP Environment Day atana a puan angin Zoram dung leh vanga BMP Unit leh Bial hrang hrang ten thingphun nan leh an phun tawh sa te enkawlna hun atan an hmang. Thawhtan zan BMP Inkhawmah environment humhalh pawimawhna inzirtirna neih zui a ni bawk.
MBMP Environment Sub-Committee te hian nikum June ni 29, 2023 kha Environment Day atan a lo puang tawh a, Unit leh Bial BMP hrang hrang ten thingphun runpui an lo kal chhopui tawh a ni. Thing hi a phun ringawt duh tawk lovin a enkawl zuina kawngah pawh theihtawp chhuahin hma lak chhohpui zel tum a ni.
MPMP Environment Sub-Committee te hian Environment humhalh kawngah theihtawp chhuahin hma an la a, Environmental Essay Competition te buatsaihin, Pledge (intiamkamna) te siamin BMP member te hian environment humhalh turin intiamkamna te pawh an lo nei tawh thin a ni. Kumin ah hian Environment tihchhiat a pawi zia inzitina atan Thuvawn Inphuahsiak kal chhohpui mek a ni a, public awareness atan Environmental Banners leh Signboards te pawh a tam thei ang bera tar turin Unit hrang hrangte pawh ngen an ni.
Environment humhalh hi BMP chuan an ngai pawimawh hle a, Environment Sub-Committee changtlung tak dinin, theihtawp chhuahin hma an lo la tawh thin a, kawng hrang hrangin hma hi lak chhoh zel an tum bawk.
