Festival-in a tum ber chu thalaite, a bik takin zirlaiten, an thiamna leh theihna phochhuahna hmun siamsak a ni.

Kumin Hill Fest-ah hian pawn lam mi leh college chhung atangin stall 40 chuang hawn a ni. A ni khat ni-ah festival hawnna hun hman a ni. Dr. C. Lalrinsangi'n he hun hi a kaihruai a. Rev. K. Lalnunsanga Director, Worship Department-in devotion hun a hmang. HATIM Vice-Pricipal Pi Hannah Lalnunpuii Khiangte-in festival hmanchhan a sawifiah-a, HATIM Principal-in thu tawi a sawi bawk.. Govt. J. Buana College leh Lunglei Govt. College cultural club te leh HATIM cultural Club ten hnamlam hmuhnawm tak an entir bawk.

HATIM Debate Club leh Literary Club te leh District Legal Services Authority, Lunglei District te thawhhonain Higher Secondary leh College-level Debate competition te buatsaih a ni a. He debate competition-ah hian Mizoram hmun hrang hrang atangin zirlai engemawzat an tel a ni.

He festival hi mipui nawlpui tan hawn a ni a, sumdawngte (local entrepreneurs) tana an thil dehchhuah hralhna te, thalai te’n an thiamna leh theihna an phochhuahna hmun te, naupang infiamna hmun bakah a chhimtute tana intihhlimna tha tak tak siam a ni.

KRISTIAN NAUPANG PAWL VENGHLUN UNIT, LUNGLEI DIAMOND JUBILEE LAWMNA NEIH A NI.

March 17th, 2026 (Thawhlehni) khan KNP Venghlun Unit-te chuan Diamond Jubilee an lawm. Zing Dar 9:30-ah Monument hawnna neih a ni a, Rbt. B. Laltinkhuma Sr. Adviser-in a kai hruaia, Upa K. Lianhmingthanga Chairman, BCM Venghlun-in Monument hawnna leh Pathian hnena hlanna a nei a, jubilee Dar Vuak nghal a ni. Jubilee thupui atan  “Lalpan thil ropui tak min tih sak” (SAM 126 : 3) tih hman a ni.

Monument hawnna neih zawh hian Inkhawmna neih chhunzawm nghal a ni a, Pu Vanlalsanga Asst. Convener-in a kai hruaia, Nl. R. Lalrinsangi Asst. Secretary hnen atangin report tlangpui nghaihthlak a ni. Rev. Dr. F. Lalsangliana Bialtu Pastor, Rahsiveng Pastor Bial-in Souvenir tlangzarhna a nei.

Nl. K. Ramthianghlimi KNP Promoter hnen atangin thuchah ngaihnawm tak ngaihthlak a ni. Inkhawmah hian Zaipawl, Malzai, Group zai leh recitation te ngaihthlak a ni bawk.

Chawhnulamah Fellowship neih a ni a, tlailamah Jubilee lawmna ruai ropui taka theh a ni. Zanlamah inkhawm neih leh niin Jubilee lawmna chu a tiak.

 KNP Venghlun Unit-ah hian member mipa 51 leh hmeichhia 49, an vaiin  100 an awm mek a ni.

 CHRISTIAN HOSPITAL LAWNGTLAI, POOR PATIENT FUND A TAN INKHAWMPUI THAWHLÂWM HLAN A NI

ṬKP Chawngte West Pastor Bial Inkhawmpui vawi 2-na March 13th - 15th, 2026 khan neih a ni a, inkhawmpui thawhlâwm hi Lawngtlai Christian Hospital Poor Patient Fund atan Rs. 16,670 (Singkhat sangruk zaruk sawmsarih)hlan a ni.  

Bus thar Pathian hnena hlanna neih  a ni.

March 16, 2026 chawhma dar 10:30 khan Baptist Higher Secondary School-a hman tur Bus thar Pathian hnena hlanna neih a ni. Bus thar hlanna hi Headquarters Office kawt zawl-ah neiin, Rev. RC. Lalthanzama Director, Education Department chuan a kai hruai a,  report tlangpui a pe nghal. Rev. R. Lalrintluanga AGS (Mission)in Pathian hnena hlanna leh lawmthu sawi tawngtaina hun a hmang.

Motor thar hi Assembly 2025-in a rel angin Baptist Higher Secondary School tan lei a ni. Motor manah hian cheng nuai sawmnih paruk sing sarih sangnga zali (26,75,400) sen a ni.