Lunglei Municipal Council hruaitu turte inthlanna (election) hmasa ber March 29, 2023-a neih turah Mizoram Baptist Kohhran chuan a hnuaia tarlan ang hian thuchah a siam:
- Lunglei khawpui chhunga mipui leh vantlang inrelbawlna enkawltu ‘Lunglei Municpal Council’ hruaitu turte inthlanna neih turah Mizoram Baptist Kohhran chuan inthlanna fel leh thianghlim neih a duh.
- Party hrang hrang leh candidate zawng zawng ten Pathian rawn chunga inthlanna (election) fel leh thianghlim a awm theih nan hma la theuh turin a ngen a, mipuite pawn theihtawp chhuaha tawiawm theuh turin a ngen bawk.
- Mizoram Baptist Kohhran hi a din tirh atangin political party tan bik leh awn lam bik a nei ngai lo a, sawrkarna chelh apiang chu Pathian ram leh khawtlang hmasawnna tur atan a tawiawm mai thin. Chu chu chiang takin Mizoram Baptist Kohhran Thurin Puanchhuah ‘Article No. 12 – Sawrkar’ ah ziak lanin a awm. Hetiangin:
"Mihringte a huhova tha taka kan khawsak theih nana ram rorelna sawrkar awm hi Pathian ruat a ni. Chuvangin ram roreltute chu kan tawngtaisakin an thu pawh Pathian Thu nen a inkalh loh chuan kan zawm tur a ni." (Sam 72:11; Mat 22: 15-21; Rom 13:1-7; 1Pet 1: 13-16).
- Chuvangin Lunglei khawpui chhunga mipui zawng zawng ten khawtlang leh mipuite hmasawnna tur atana hruaitu tur kan thlanna kawngah inthlanna muanawm loh thlen tir theitu hmanraw thalo lakah fihlim ni se. Tawngtaina nen Pathian duhdana dikna leh thianghlimna nena inthlan hmachhawn theuh turin political party tinte leh mipuite Mizoram Baptist Kohhran chuan a ngen.
Dated: 15th March 2023
Sd/
REV. R. LALBIAKLIANA
General Secretary,
Baptist Church of MizORAM
