Nikir thla ni 12 Ningani zan dar 7 khan. KNP Lunglawn Unit chuan an Unit Din champhaphak vawi 75-na chu BCM Biak In Lunglawnah ropui takin an lawm.:
Jubilee lawmna Inkhawm hi, Rbt. Lalhruaimawia Jubilee Org. Chairman in a kai hruaia, KNP Lunglawn Unit ten Opening Act hmuhnawm tak an en tira, Pu C Lalhmangaiha Secretary Organising Committee in report tlangpui a pek zawhah , KNP Promoter Ni K lalramthianghlimi leh KNP hruaitu lo ni tawh ten Jubilee lawmpuina thu tha tak tak an sawia. OB hmasaber te zingami Pu F Pathanga leh Pu F Lalthantluanga ten Jubilee hi an rawn hman pui nghe nghe a ni. Unit zaipawlin hla mawi tak an rema, Rev Sangliankhuma Chinzah Bialtu Pastor in thuchah a sawi a, Abel Vanlalhriatrenga leh Lalruatsangi Chawngthu te hnen atangin malzai mawi tak ngaihthlak a nih hnuah, Joseph Lalngilneia leh Loisi Malsawmhlui Pachuaute’n recitation thiam taka sawiiin, Henry Lalremtluanga leh a thiante hnen atangin Live Band mawi tak ngaih thlak a ni bawk.
Kristian Naupang Pawl Lunglawn Unit hi Dt 12th, June, 1950-ah Pu PC. Rongenga, Pu C. Biakchhinga leh Pi H. Rothuami te kaihhruaina hnuaiah din a ni a. KNP Lunglawn Unit hi Kum 1971 atangin hruaitu (Office bearers) mumal taka inthlanna neih leh record bu vawn tan a ni. Kum 1971-2025 inkarah KNP hruaitu engemawzat an awm tawh a, an hming tarlan sen vek anih loh avangin Office Bearers hmasaber kum 1971 a mi te tarlang I la.
Convener Pi K Liankimi
Asst. Convener Pi ZD Lalhmingi
Secretary Pu C Laltlanthanga
Ass. Seceretary Pi H Lalrinmawii
Treasurer Pu F. Pathanga
Fin. Secretary Pu F Lalthankhumate an ni.
Kum 75 chhungin KNP Lunglawn Unit pawhin remchan dan leh theih dan danin sumtuakna neih thin a ni a, a langsar zual tlem han tarlang i la – 1. KNP Thingkhawn siam (1971-1991) 2. KNP Ar vulh 3. Ramthim Ar vulh 4. Sachek zawrh 5. Pheikhawk nawh 6. Balu/Rora/Brick thiar 7. AIR Lungleiah Dram leh naupang pual hun hman. 8. Inkhawm leh Fellowsip thawhlawm. Kum 75 chhung a rawngbawlna thenkhat langsar zualte lo tarlang ila- 1. Missionary pali (4) chawm. 2. KNP Inkhawm leh Fellowship neih thin. 3. Hunpui a Drama leh Skit entir. 4. Kalvari kawng tih Film siam. 5. Missionary tanpuina pek. 6. Mission Field a Biak In leh School sak nana sum thawh. 7. Bial KNP Inkhawmpui a chanvo hrang hrang neih. 8. KNP member leh hruaitu zing atangin Pastor te, Pathian thuzir leh Missionary engemaw zat an lo chhuak tawh bawk a ni.
