Mizoram Baptist Kohhran, Medical & Health Department, Christian Hospital, Serkawn-a LDC hna thawk mek Pu C. Vanlalnghaka chu. May 1, 2024 (Nilaini) chawhma dar 11:40 khan Christian Medical College & Hospital, Vellore -ah chatuan ram min pan san ta.
A ruang hi Vellore atangin rawn phurh haw a ni a, May 2, 2024 zan dar 11:00 khan Lunglei rawn thlenpuiin, Headquarters hruaitute leh Department hotute leh thawktuten an lo hmuak a. a ruang chungah pangpar dahin Rev. R. Lalnunzira, AGS - Service-in tawngtaina-in a thlah a, hemi zawh hian an chenna in, Bazarveng, Lungleiah luhpui a ni ta a ni.
Vawiin May 3, 2024 (Zirtawpni) chhun dar 12:00 ah an chenna in, Bazar veng-ah vuina inkhawm neih a ni a, BCM leh Department aiawhin Upa Dr. Lalramzauva, Director, Medical & Health Dept.-in thu a sawi a, Bialtu Pastor Rev. K. Lalbiakchhawna’n vuiin thuchah a sawi hnu-ah, Bazar veng Thlanmual No-1 ah ropui taka thlahliam a ni. Pu C. Vanlalnghaka hian a nupui leh a fate pahnih a kalsan a ni.
Pu C. Vanlalnghaka hi Mizoram Baptist Kohhran chuan a sun takzet a, thahnem ngai taka rawng a lo bawl tawhna te hre rengin a rawngbawlna avanga lawmthu sawi chungin ui leh zah takin a thlah liam ta a ni.
