January 11, 2025 hi Mizoram-a Missionary hmasa ber lo thlen champha phak vawi 131-na “Missionary day’ a ni a. Kumin Missionary Day thupui atan hian “ Lalpan thilropui takte min tihsaka, Sam 126:3” tih thu hman a ni. He ni hi rampumah hman a nih theh nan Mizoram sawrkar chuan sawrkar chawlh (State Holiday) atan a puang thin a, Kuminah pawh sawrkar chawlh-ah puangin kohhran hrang hrang ten awmni khamin ruai nen hun an hmang a ni.

Missionary Day zingkarah BCM Headquarter Office kawt BCM Monument ah BCM Headquarter hruaitute, Pastor leh tualchhung kohhran hrang hrang atangin Upa leh rawngbawltute kalkhawmin, Zofaten chanchintha kan dawn avang leh chanchintha avanga chhandamna leh malsawmna kan dawnte hre thar chungin Pathian hnenah urhsun takin lawmthusawina hun an hmang a ni.

Hemi hnuah Kohhran tinah Pathian biak Inkhawm neiin Thupui thlansa “Lalpan thilropui takte min tihsaka, Sam 126:3” tih hmangin thuchah ngaihthlak a ni a, chawhnu lamah Pathian faka zaikhawm programme te siamin, tlai lamah Missionary day lawman ruai kil ho  a ni. Zan lam inkhawm pawh Missionary Day lawmna Programme hman chhunzawm leh a ni bawk. Missionary Day ah hian Headquarters hruaitute pawhin Kohhrante sawmna chhangin kohhran hrang hrangah hun an hmanpui a ni.

January 11, 1894-ah Zosap Missionary hmasa ber Sap Upa leh Pu Buanga te chuan Sairang rawn thlengin Mizoram leilung an rawn rap a. Aizawl-ah kum 3 an awm hnu-ah March 8, 1903-ah Baptist Missionary Society tirh-in Mizoram Chhim lamah an rawn lut leh a, Serkawn, Lungleiah awm hmun an khuar ta a ni. Chanchin Tha lo thlen atanga kum 100-na, Gospel Centenary chu 1994-ah Mizoram pum-ah ropui takin lawm a lo ni ta a, kum 1989-ah Mizoram Sorkar chuan Kohhran pahni PCI leh BCM te ngenna angin January 11 chu Missionary Day-ah puangin heta tang hian kum tin January 11 chu Sokar chawlh “Misionary Day” atan a lo puang chhunzawm ta zel a ni.