Missionary Pi Malsawmsangi Hnialum, BCM Ngengpuitlang a thawk pasal Pu Lalruatkima, Mualศhuam North chu nimin March 27, 2025 ( Ningani tlai ) khan an bathroom-ah tlusual palhin a boral.
Pu B. Lalruatkima hi Pu B. Lalfakzuala leh Pi V. Zasiami te inkarah August 15, 1989 khan Mualthuam ‘N’-ah alo piang a, unau panga niin:-
1. C. Zamawia H/o Lalpianmawii
2. C. Zorimawii W/o Lalrintluanga Sailo
3. B. Lalruatkima H/o Malsawmsangi Hnialnum (Kan sun mek)
4. B. Lalthakimi W/o Lalmuankima
5. B. Lalhmangaihsangi W/o Benjamin Lalsiamliana
Pu B. Lalruatkima hi tleirawl sual pawh nei lem lo, mi nuntluang leh fiamthu duh tak, awmkhawmnaah pawh nuihna siamtu ber, mitin ngainat leh fiam hlawh em em mi a ni a. Kohhran leh TKP lamah pawh theihtawp chhuaha rawngbawl thin a ni. TKP Executive Committee member Kum ruk (6) chhung (2014-2019) chelh tawh, TKP Group-ah Leader leh Secretary etc. kum tam tak chhung lo chelh tawh thin; Kohhran zaipawl (Standing Choir-ah) Kum 5 chhung zet a tel tawh bawk a ni. KNP Leader Kum hnih chhung ni tawhin, Evangelist team rawngbawlna lamah pawh a tui em em a. Revival Team (Upa T.Lalengzauva ) leh Lalpa hnathawh kengtu Team (Rbt. R. Vaninmawia) te Team member niin kohhran hrang hrangah rawngbawlin a chhuak thin a ni.
June 25th, 2019 khan Pi Malsawmsangi Hnialum nen BCM Kohhran dan puitlinga inneiin, fapa duhawm tak, Eliza Lalhriatpuia (kum 5) nei a. 2019 kum hian Missionary-a a thiannu thawhna hmun, Ngengpuitlangah awmin, rawngbawlna chhunzawm chho zelin, heng a hnuaia tarlan te hi Ngengpuitlangah a boral ni thlenga chanvo a chelh te an ni.
1. Kum 2019 atanga tun thleng hian BCM Ngengpuitlangah rawngbawltu a ni.
2. Kum 2019-ah vek hian Sunday School-ah Baptistma zirtirtu tun thleng hian a ni.
3. Kum 2019-2025 chhung atan Bial Zaipawl Member a ni.
4. Kum 2020-ah Unit TKP Secretary a ni.
5. Kum 2021-2025 chhungin Unit TKP-ah Fin. Secretary a ni.
6. Kum 2023-ah Unit TKP leh KNP-ah Secretary a ni.
7. Kum 2024-ah KNP Convener a ni.
8. Kum 2024-ah Sunday School Asst.Secretary a ni.
9. Kum 2025-ah KNP Sr. Adviser leh Unit TKP-ah Vice-President a ni.
A hun hnuhnung : March 27th, 2025 khan zingkar atangin TKP Ngengpuitlang unit OB-te chuan Baptist Mission School (BMS) hung thatna tur thing satin an hnatlang a. Hnatlan zawh hnu tlailamah a inbual tur chu Bathroom-ah tlusual palhin, a nupui leh thenawm khawveng te’n theih ang ang a bawihsawm nghalin; nasa takin an au a. A nupui auhna ri aia ring zawk van kohna chu chhangin, nuam ti tak leh duh taka a rawng a bawlsak Lalpa hnena chawl turin a liam ta a ni.
A ruang hi an chenna Mualthuam ‘N’ panpui nghal a ni a. Ngengpuitlang khawtlang, YLA, an thawhpuite leh Lawngtlai lam atangtein mi eng emaw zatin an zui a. Rev. Lalremsiama Ralte, Mission Director Qtrs chenna in Serkawnah chawlhpui a ni a. Rev.V. Vanlalchhunga’n tawngtaisakna hun hmangin, Mualthuam ‘N’ panpui nghal a ni. Amah lainattu leh thenrual tha leh Kohhran hote’n lo hmuakin BCM Biak In Mualthuan ‘N’ ah Vuina hun hman a ni. Bialtu Pastor Lalawmpuia Chinzahin inkhawm a kaihruai a, Upa V. Challawma Asst. secretary-in kohhran aiawh a thusawiin, Rev. Lalremsiama Ralte, Mission Director-in BCM aiawhin thusawina a neih zawhin, AGS Mission Rev. Dr. R. Lalthanmawia’n amah thlahna thuchah nung tak a sawi a. Hemi hnu hian Mualthuam ‘N’ thlanmualah Pu B. Lalruatkima lei taksa chu ropui taka thlahliam a ni ta.
