Kum tinin June 26 hi Khawvel pum huapa Ruihhlo that loh zia inzrtirna leh a darh zel tur laka invenna atan - International Day Against Drug Abuse and Illicit Trafficking atan 1987 atang khan hman a lo ni thin a. Kumin atana hemi Ni hman dan tur chungchang ngaihtuah a District Level Committee on Narcotics Coordination (NCORD) thukhawmin an rel angin Mizorama Kohhran tinin Ruihhlo do leh tih rem kawngah an remchan ang angin hma lo la ve se tiin Lunglei Bawrhsap chuan ngenna a siam a. Mizoram Baptist Kohhran pawhin he ngenna hi dawngin, General Secretary Charge la tu Rev. R. Lalnunzira chuan Tualchhung Kohhran tinah tihhlawhtlin a nih theih nan hma lo la tur leh, June 26, 2024 (Nilai zan) Inkhawm-ah Hemi hun hi hmang theuh turin ngenna a siam a. General Secretary ngenna hi Tualchhhhung Kohhran hrang hrangin tihhlawhtlingin he hun hi an hmang a ni.
He hunah hian Ruihhlo do leh tih rem kawnga hma la tura chona leh thuthiam sawirualna neih a ni a, Kan ram leh khawtlang, Kohhrante chenin Ruihhloin min tihbuai nasat em avangin he Ruihhlo do tur hian keimahni ngei hi kan pawimawh a, chuvangin - Zoram hi Ruihhlo laka a lo fihlim theih nan te, mahni ngei Ruihhlo laka fihlim tura theihtawp chhuah tur te, Ruihhlo a lo hluar zel lohna tur a theihtawpa tan la tur te-a intiamna neiin thu an chham a ni.
BCM Headquarters Office, Serkawna thawkte chuan hemi ni zing Devotions hun hman zawhah Internationa Day Against Drug Abuse and Illicit Trafficking hi hmang-in Rev. L. Vanlalsanga, Director, Social Concern kaihhruaina-in Ruihhlo dona leh ruihhlo zual zel tur lak invenna tan theihtawp chhuah tura intiamna hi an nei bawk.
