August ni 10, 2024(inrinni) khan Mizoram Ṭhalai Kristian Pawl Executive Committee Meeting Vawi 548 chu Sap Upa leh Pu Buanga Hall, BCM Hqtrs Office, Serkawn-ah tluang taka neih a ni.
Meeting hi Upa R. Lalrochama, President MṬKP chuan kaihruaiin, MṬKP Secretary Rev. F.Zorinkhuma hnen aṭangin Meeting hmasa thurel umzui dan hrang hrang te, MṬKP thuzir exam question peih a nih tawh thu leh thawn chhuah tur hmalak mek a ni thu te, Youth Centre Development Committee hmalakna te, Kohhran leh Sawrkar hmalakna hrang hranga Mizoram ṬKP tel ve na te leh MṬKP hmalakna hrang hrangte report a pe a. Report kim chang hi rorel member te hnenah ziaka sem a ni.
MṬKP Treasurer Nl. J.Lalrintluangi chuan sum dinhmun leh hman dan ziakin report a pe a, report aṭanga a lan danin tun dinhmunah sum hman theih ₹6,25,950/- a awm mek.
Tv. Lalruatkima, Fin.Secretary MṬKP pawhin sum hmuh dan ziakin report a pe a ni. Report aṭanga a lan danin MṬKP Target pe tlak tawh bial 52 an awm a, Ramthim Ni thawhlawm thehlut tawh bial 46 awmin ṬKP Day thawhlawm pe lut tawh Bial 5 an awm mek. Hetih rual hian MṬKP Thuzir bu man la pe lut lo bial 39 an awm a, MṬKP inkhawmpui dawltu ṭanpuina pe lut lo bial 84 awmin CHS Lawngtlai pual thehlut tawh bial 87 an awm mek thu tarlan a ni.
Meeting ah hian thu pawimawh tam tak rel a ni a. MṬKP-in a tlawh khat deuh bial te thlang chhuakin tlawh tura ruahmanna siam a ni a, Bial hrang hrang aṭanga MṬKP in sawmna a dawnte tihhlawhtlin dan tur leh MṬKP Inkhawmpui 2025 chungchang pawh ngaihtuah a ni. Heng bakah hian Chhimtuipui kai, Kawlchaw West-a MṬKP Hoarding chei ṭhat dan tur te, Gospel Centenary hriatrengna atana MṬKP in Kraws a siam enkawl chhunzawm dan turte bakah thu pawimawh tam tak ngaihtuah a ni.
