Phar Pual Pathianni Thuchah:

            TLM rawngbâwlna-a BCM kan inhman tanna chu July 1, 1975-ah Rev. KD Siamliana-te nupa, Bhutan ram East Mongar-a kan Missionary-te Phâr Damdawi In-a an thawhna kha a ni. Hun inher danglam leh Sawrkar tharah kal phung thar tam tak a lo chhuah tak avângin, Mizoram-a The Leprosy Mission Trust rawngbâwlna chuan a kal zêlnaah harsatna tawkin, ram chhûng leh ram pawn atanga tanpuina sum chet vêlnaah kalpui zêl rem lohna chin a lo awm ta a. Amaherawhchu, Phârte zinga rawngbâwlna chu chawlhsan mai lova chhunzawm zêl a nih theihna turin The Leprosy Mission Mizoram chu kum 2017-ah khân din a lo ni leh ta a. Tunah hian Bethany Colony Leprosy Association (BCLA)-te nena thawk hovin, Andra Pradesh State-a Guntur District chhûnga Bapatla khuaa phâr enkawlna hmun (Colony), India rama phâr enkawlna hmun lian berah TLM Mizoram chu a bung chhunzawm ta zêl a. Hetah hian phâr 1200 vêl zet enkawl mêk an ni a. Hei bakah hian Mizoram chhûnga phâr natna veite zawn chhuah leh enkawl a, tisa leh thlarauva chhanchhuah leh chhawmdawl hna thawh zêl hi TLM Mizoram-in a tum chu a ni.