Tunkar Pathianni June 15, 2025 hi Mizoram Baptist Kohhran Ni pawimawh “Relief Sunday” a ni a. He Ni hi Mizoram Baptist, Tualchhung Kohhran tinah hman a ni ang.  Kumin Relief Sunday thupui chu “Pathian lawmtlak inthawina’ (Hebrai 13:16) tih a ni. Relief Sunday-ah hian Pathianni zing inkhawmah Headquarters leh Tualchung Kohhran Relief rawngbawlna chanchin report leh thupui thlan sa hmangin thuchah ngaihthlak a ni ang.

Relief Sunday Hman tan dan leh hman anih chhan 

Kum 1966-1968 lai vel khan Mizoramin hun khirh tak tak mai a tawk chho va, Mau tamin min nuai hnu lawkah Mizoram buaiin min han nang leh ta a. Chubakah tihluihnaa khaw sawi khawmin kan awm a, Mizo mipuite kan mangang tak tak a ni. Heng harsatna laka min chhawm dawl turin India ram leh ram pawn thlengin Kohhran kal tlangin tanpuina (relief) kan dawng thin a. Heng tanpuina kan dawnte hi mumal taka kan sem chhuah theihna tur leh Kohhran pawhin mipui mangangte tanpuina tur thawhlawm (Relief Fund) a bika siamtha a ti ta bawk a.

He chhawmdawlna rawngbawlna hi Kohhrante thinlungah tuh thar zela, uar deuh deuh a lo nih theih nan kum tiin June thla Pathianni vawi thumna zel hi he mi pual hian Kohhranin hman ni se tih a lo ni a. Kum tinin Relief Sunday hi June Pathian ni vawi thumnaah hman a lo ni ta a ni.

Chhawmdawlna hna thawk turin tunah chuan BCM Headquarters-ah chauh ni lovin Bial leh Tualchhung kohhranah pawh Relief & Development Committee chu din a lo ni ta zel a. Tangkai takin chhawmdawl ngaite chhawmdawl hna a thawk ta a ni.

Relief & Development Department rawngbawlna lian ber Relief hna hi nasa taka kalpui chhunzawm zel a ni a. Khuarel chhiatna, tui lian, leimin, thli leh rial, kangmei bakah tanpui ngai an awm reng a, heng  tuar tute chhawmdawl nan Tualchhung budget atang leh pawn lam tanpuina kan hmuh atangin tanpuina pek thin a ni.

Tun hnai ruahsur leh thli tlehin harsatna Mizoram hmun hrang hrangah a thlen mek a, tun china tanpuina kan pek chhuah tawh zawng zawng hi chhungkua 60 hnenah  Rs. 3,89,000 a ni. Hengte hi Bialtu Pastor kaltlang leh Staff te’n a hmunah kalin kan pe thin a ni. Heng bakah hian a remchan dan leh an mamawh a zirin Silpouline te pein an sem chhuak thin bawk.

Kum 2025 – 2026 chhunga Relief budget hi  Cheng Nuai sawm (Rs. 10,00,000 ) a ni a.

Chhungkaw 60 hnenah cheng Nuaithum singriat sangkua sem chhuah a ni tawh..