Tunkar Pathianni, June 8  hi Thlarau Thianghlim thlen ni (Pentecost Ni) a ni a. He Ni hi khawvel pumah Kristian te chuan urhsun takin an hmang ţhin a. Mizoram Baptist Kohhran pawhin he ni hi Special Sunday atan a hmang ţhin a . Kumina Thlarau Thianghlim thlen Ni Thupui chu Tirhkohte Thiltih 1:8 thu “Thlarau thianghlim thiltihtheihna? tih a ni ang.

Thlarau Thianghlim thlen ni hi kum tina insawn danglam fo ţhin a ni a. Kuminah hian June 8-ah a lo inher chhuak ve leh ta a. Mizoram kohhrante pawhin khawvêl puma Kristiante Calendar-a ni pawimawh, kum tina an hman thin chu zawm vein, BCM Nipawimawh zingah chuan tir ve zel ţhin a ni. Headquarters lam aţanga hman dân tur programme duan a ni lem lo va; tualchhung kohhranin ţha leh rem a tih anga hman mai tur a ni. BCM hian eng hun chiah aţang khan nge he nî hi kan lo hman ţan tih record a awm lova. Kan Missionary-te kaihhruainain kohhran din tirh tê aţanga hman chhoh ve zêl ni-âwm tak a ni.

Tun hma chuan ‘Pentikos Nî’ tia lam ve mai ţhin a ni a; hei hi BCM Assembly chuan Juda-te kût chhawm zui zêl kan nih loh avângin dik tawk lovin a hria a, ‘Thlarau Thianghlim Thlen Nî’ tia hman turin a lo rêl ta a ni.

Thlarau Thianghlim hi Lal Isua thawhlehni aţanga chhuta ni sawmnga-naah a lo thleng a. Ringtute hnêna leih a nih nî chiah a nih bawk avâng leh, kohhran din a, ti harha, thiltihtheihnaa thuam leh a chênchilh ţan nî a nih avângin, he nî hi ringtute leh hmun tina kohhrante tân ni pawimawh leh chhinchhiah tlak a ni.

Kristiante tan a pawimawhna:

Pathianin Mosia kaltlanga Sinai tlanga Dan a pek ni nia ngaih a ni.

Pathian hnena lawmna thilpek an hlan hun kha a ni.

Pathian be tura Judate Jurusalema an kalkhawm ţhinna kữt ni a ni

Ringtute chenchilh tur leh thlarau lam dan thar pe tura Thlarau thianghlim lo thlen ni a ni

 Chi tin leh hnam tin hnêna Kristiante thuchah puan tur chhhinchhiahna a ni.