April 13, 2025 (Pathianni) hi Kohhran ni pawimawh – Tumkau Pathianni (Palm Sunday) a ni a. He Ni hi khawvel pumah Kristiante chuan urhsun takin an hmang thin a. Mizoram Baptist Kohhran pawhin Kohhran Nipawimawh zingah telhin urhsun takin kan hmang thin a ni. Kumin Tumkau Pathianni thupui chu ‘I thinlungah Krista chu Lalah ruat rawh u'. (I Petera 3:15) a ni ang.
Tumkau Pathian ni hi Lal Isua Jerusalema Lal anga a luh ni hriat rengna ni a ni a. Pathianni a nih bakah Kristiante tan ni pawimawh bik, Lal Isua Lal a nihna puan chhuah thar lehna hun leh amah chawimawina ni atan hman a ni. Hetianga hmang hmasa bertute chu Jerusalem kohhran an ni a, kum zabi 4-na tawp lamah an hmang tan chauh niin sawi a ni. A tak taka Lal Isua Jerusalem-a Lal anga a luh atanga kum 300 hnu daihah he ni hi serh tan a ni chauh tihna a ni.
Tumkau Pathian Ni hi ‘Hnehna nena (Jerusalema) luhna ni’ (Triumphal Entry) ti pawhin sawi a ni bawk. He hun hi a pawimawh em avangin Chanchin Tha bu ziaktu palite hian an ziak theuh a ni (Matt.21:1-17; Marka 11:1-11; Luka 19:28-42; Johana. 12:12-14).
A pawimawhna chhan chu:
1) He khawvela a awm chhunga vantlang hriat khawpa langsara Jerusalem khua a luh chhun a ni.
2) Tisaa a awm chhunga mipui vantlang chawimawi a hlawh ve tum a ni.
3) Vantlang hriata Lal a nihzia tarlana a awm tum a ni.
Matthaia chuan he hun ropui takah hian mipui zinga a tam zawkin Lal Isua kalna kawngah chuan an puante an phah bakah thinga mi chhawl an sat a, an phah bawk tih a sawi a, (Matt.21:8).
Johana chuan Jerusalem mipuite’n tumkau kengin an hmuak a ti a. (John 12:12-13). Lal Isua chu Galili ram atangin a thilmak tih hmutu tamtakin an rawn zui a, Jerusalema khawpuia cheng, amah ringtute’n an lo hmuak bawk a, amah rawn zuitute leh lo hmuaktute chuan rilru hmun khatin Lal Isua chu an theihtawkin he hunah hian an chawimawi a ni. Chutianga amah ngaisangtute’n an chawimawina chu chhunzawmin, tumkau/hnahchhawl chawiin Lal Isua chawimawina kawng zawh hi Kristiante zingah neihzui a ni ta zel a ni. Tumkau Pathian Ni-ah hian Lal Isua chawimawia tumkau nena kawng zawh hi naupang (KNP) tih turah kan dah deuh niin a lang a, a tawk lo hle. Jerusalem chhehvela mipui, Lal a nihzia la hre chiang tak tak lotute mahin khati khawpa an chawimawi chuan, keini a hre chiangtu, thinlung tihvar tawhte hi chuan theihtawpa chawimawi hi kan tih ngei tur a ni.
A chunga kan tarlan ang khian vawiin thupui atan ‘I thinlungah Krista chu Lalah ruat rawh u'. (I Petera 3:15) thlan a nih ang hian Vawiina tumkau Pathianni hmangtu zawng zawng te’n Kan thinlungah Krista chu Lalah kan ruat thar leh theuh theih na turin Lalpan Malsawm theuh che u rawh se.
