Baptist Church of Mizoram, Assembly hnuaia Rorelna sang ber, Assembly  Executive Committee Meeting ni hnih awh tura ruahman chu January 17,  2024 (Nilaini) khan BCM Hall, Headdquarters Office, Serkawn-ah neih a ni a. Meeting hi BCM President, Rev. KV Thanga’n a kaihruai a, General Secretary Rev. R. Lalbiakliana’n Department hrang hrang report khaikhawmin a pe. Tun tum Executive Committee meeting-ah hian member 288 an  kal a, Meeting hi ni hnih chhung neih tura ruahman ni mahse ni khatah an zo fel thei ta a ni

January 16, 2024 (Thawhlehni) khan Mizoram Baptist Mipa Pawl (MBMP) Executive Committee Meeting vawi 11-na chu Sap Upa leh Pu Buanga Hall, Serkawn-ah neih a ni a. Meeting hi Rbt Chawngrolura, President-in a kaihruai a, Rev. H. Lalfakzuala, Secretary, Pu Lalnunsanga Pachuau, Treasurer leh Pu Vanlalpeka, Fin.Secretary ten report an pe.

January 12-14, 2024 chhung khan Tripura Baptist Youth Fellowship Conference, KOK Baptist Association ten dawlin, KOK English Medium School ah  neih a ni a. Inkhawmpui thupui-ah Thupuan 2:10 thu ‘Thih thlengin rinawm lo awm rawnh”  tih hman a ni.

BCM Relief & Development Department 16th January, 2024-a thukhawm chuan Canadian Baptist Ministries Project hnuaia Field Facilitator hnathawktur a la thar a. 18th January, 2024(Wednesday) Dar 11:00 AM-ah Director, Relief & Development hnenah Joining Report a pe ang.

BCM Relief & Development Department January 16, 2024-a thukhawm chuan a hnuaia hming tarlante hi January – June, 2024 chhung atan Puanthui zir tur mi 16 leh Beauty & Welness Course zir tur mi 4 a la a. January 23, 2024 (Thawhlehni)  Dar 10:00 AM-ah R&D Skill Training Centre, Ramzotlang-ah class tan tur a ni ang.

Mizorama Chanchintha lo thlen dan chanchin (documentary film) communications department in a buaipui mek chu December 27, 2023 leh January 9, 2024 inkar khan a hmawrbawkna shooting tluang taka neih a ni.

Vawiin, January 11, 2024 hi Mizoram-a Missionary hmasa ber lo thlen champha phak, vawi 130-na “Missionary Day” a ni a. Kumin Missionary day Thupui atan “Kohhran Hnapui – Chanchin Tha Hril” (Marka 16:15) tih hman a ni. He Ni hi ram pumah hman a nih theih nan Mizoram Sorkar chuan Sorkar chawlh (State Holiday) atan a puang thin a, kuminah pawh Sorkar chawlh-ah puangin, Kohhran hrang hrang ten awmni khamin ruai nen hun an hmang a ni.

January 5,2024 (Zirtawpni) Thingfal khawpui chhunga Kohhran pakhat BCM Mamte ‘T’ Biakin chu Rev.Dr.Lalzarliana, Director, Communications, Literature & Printing Dept, BCM Headquarters chuan a hawng. Zaithiam Sailo Lalsangzuali, BCM Moria, Rahsiveng chuan Communications Director hi tawiawmin, Biakin hawnna Inkhawmah zaia rawngbawlna a nei bawk. Thingfal Pastor Bial hruaitute leh a chhehvela Kohhran ho bakah hmun hrang hrang atangin Biakin hawn hi an rawn chhim a. Tin, Kohhran pawl dang, UPC, Presbyterian leh Salvation Army hruaitute an lo tel bawk a, hlim takin ruai nen hun hman a ni.

Mizoram Baptist Kohhrana thawktu te chuan January 10, 2024 (Nilaini) chawhma dar 11:30 khan  kum thar atana Inhlantharna hun an hmang. Lunglei-ah chuan Headqurters Office, Serkawn leh Lunglei-a Kohhran zirna in leh Office hrang hranga thawktu ten inhlantharna hi BCM Hall, Serkawn-ah an nei a, Rev. R. Lalnunzira, Associate General Secretary, Service in Inkhawm a kaihruai a. Pu V. Vuansanga, Principal, HATIM-in Pathianthu chhiarin tawngtaina a neih hnu-ah General Secretary Rev. R. Lalbiakliana’n Thawktute lawmna leh chibaibukna sawiin, BCM dinhmun leh hmalakna tlangpui a tarlang bawk.

January 9, 2024 (Thawhlehni) khan Mizoram Baptist Kohhran chuan Kum thar atana Office kai ni hmasa ber hmangin Office an hawng tan leh ta.  BCM thawktu hmun hrang hranga Christmas leh Kumthar hmanga zin chhuak te leh mahni hmun lama hawte pawhin Office kaini hmasa ber hi ngai pawimawhin an rawn haw kim  thei vek a, thawktute zingah damlohna avanga kal thei lo leh Duty pawimawha kal te tih loh chu Office an kai tha hle a ni.

Kohhran hnuaia thawktu Department hrang hrang-a nitin Office kal te chuan December ni 15, 2023 (Zirtawpni) atangin Krismas leh Kumthar chawlh an hmang tan ta a, hemi chhung hian Headquarters Office te, Executive Secretary Office, Aizawl leh Lawngtlai te leh department Office dang te pawh khar a ni. Hetih lai hian, Hospital, zirna in te leh home te chu anmahni remchan leh kalphung pangngaiin an kal ang a, Department hotute ruahman angin  duty leh hna kallai pawh a pangngaiin an kalpui zel rih ang.

December 14, 2023 (Ningani) zan khan Communications Department buatsaih - Fak Lam (Worship Dance) intihsiak Lawngtlai Area aṭanga Final Round-a tel tur te thlanna, BCM Biak In, Lawngtlai Vengpui-ah neih a ni a. Intihsiakna hi Lawngtlai Area ṬKP Coordination Committee ten buaipuiin, Nl. Zohlimpuii Chhakchhuak-in a kaihruai a. Fak lam Organising Chairman Rbt. Elvis Lalthangzuala’n hunserh hmangin, Organising Secretary Teddy Lalrinliana Aineh-in report a pe a, Nl. T. Lalhlimpuii leh Emely Laldinmuani te’n fakna hla an sa bawk. Tel zawng zawngte hnenah lawmman sem a ni a, Pu Joseph Lalhmingthanga Chinzah, Chairman, Lawngtlai Area ṬKP Coordination Committee-in lawmthu sawina leh ṭawngṭaina-in hun a khar a ni.

Administrative Committee-in ruahmanna a siam angin Executive Secretary Office, Aizawl chu Baptist House, Upper Khatla atangin  December  14, 2023 khan Baptist Centre, Falkland-ah in sawn fel a ni a, December 19-ah Baptist Centre leh ES Office Pathian hnena hlanna leh hawnna hi neih a ni ang.

December  14, 2023 (Ningani) chawhnu dar 01:00 khan Jubilee Bible School chuan BCM Biak in, Ramzotlang, Serkawn – ah Zirlai chhuak turte Certificate hlanna leh thlahna Inkhawm, Graduation Service an hmang.

December 13 zan atanga ni 14  khan Baptist Boarding School,  Chawngte chuan kum 50 an tlin champhaphak ‘Golden Jubilee’ an lawm a. He hun hmanpui hian Headquarters atangin Rev. Dr. R. Lalthanmawia, AGS Mission, Rev. Lalremsiama Ralte, Mission Director, F. Lalrammmawia, Production Assistant leh Pu H. Lalrinpuia Driver te an kal a.  He school zirtirtu lo thawk tawh te leh zir chhuak tawh hmun hrang hrang atanga tel an awm bawk.