- Upa P.C. Rochhûma, Bualpui ‘V’

Inthawina awmzia:

Inthawina tih \awngkam hi kan thurin bu-ah kan hmu hnem hle a, chu chu kan chhui tur ber pawh a ni. Mizote pawh kan pipute a\anga inthawi \hîn kan nih avângin a awmzia kan hre tlângpui vek tûrah dah ta ila. Inthawina hi hnam hrang hrangin Pathian an biaknaa an thiltih langsâr êm êm a ni. An Pathian tihlâwm nân ran emaw mihring emaw an hlan \hin hi a ni mai. Engpawh ni se, inthawi chhan kawng hrang hrang awm mahse a tlângpuia lâkin inthawina awmzia leh a chhan chu hetiang hi a ni awm e. i) Pathian tihlâwmna a ni. ii) Pathian hmêlma sual hnehsakna a ni. iii) Inthawina ran hian inthawitu sual ai a awh \hîn.

Mizote leh Bible ram mite inthawina kan hmuhah chuan ran an hmang nasa hle. Central India-a Korku hnamte pawh an inthawi nasat thu Rev V. Vanlalchhunga’n a sawi a. Tin, Pu Rosangliana Fanai chuan Mire ho inthawi uar zia a sawi bawk. Pu Thangzaliana, Presbytarian Missionary chuan Assam rama Karbi ho mihringa an inthawi \hin thu a sawi bawk. Engpawh ni se, Thuthlung hlui huna Pathian mite chuan inthawinaah chuan ramsa pawh ni lo, lui sa pawh ni lo, mihring ran vulh ngeia inthawi hi chîn dân a ni. Ranvulh zîngah pawh berâm, bâwng, kêl, \huro, parva etc. tih te hi bible-a kan hmuh leh an hman \hin langsâr zualte an ni.

Puithiam kal tlanga kâwla ni chhuak chhiara an inthawi reng lai pawh khan lehlamah thil thlauh thlâk an neih a, an nun an uluk loh chuan an inthawina kha Pathianin a hnê \hîn a ni. Entîrnân - Amosa chuan, Pathianin rorêlna dik a ngaih pawimawh thu a tlângaupui nasa hle a, Saul-a hnênah chuan Pathianin inthawina aia thuawih a duh zâwk thu a sawi bawk a. Davida suala a tlûk lai khan a thaw a pik hle mai a, ‘Inthawina chungah lâwmna i nei si lova, chuti ni suh sela chuan ka pe ang (Sâm 51)’ tiin Pathianin thinlunga inchhîrte lam a hawi zâwk thu a puang bawk. Inthawina hmachhuana nun lam uluk si lo hi Lalpan a pawm \hîn lo a ni.

Thuthlung hlui lama inthawina kan hmuhte hi Pumhâl thilhlan te, Buhbâl thilhlan te, Remna thilhlan te, Sual thawina te leh Bawhchhiat thawina te hi a langsâr deuh te an ni. Sual leh bawhchhiat thawina thuthlung hluia kan hmuh te hi chu Lal Isua lo kal hmaa hlimthlâ, Lal Isuan a taka a rawn chan hnua tih leh hran ngai tawh lo te a ni. Engpawh ni se, Lal Isuan ama taksa leh thisen sênga a inthawina chuan mi zawng zawng tlanna a rawn thlen avângin tih chhunzawm a ngai tawh lo a ni.

Thuthlung hluia inthawina tam ber chu Lal Isua lo kal hmaa hlimthlâ, kan tih ve kher \ûl tawh lo te a ni. Mahse inthawina hi Pathian leh a betu inlaichînna tih lanna a nih avângin a kalphung a dik chuan kan tih reng tur a ni. Davida chuan, “Kan hunte hi i kutah a awm” (Sâm 31:15) a ti a. Chuvângin kan hun te, Pathian malsâwmna kan dawnte inthawina atâna hlân zêl tur leh ‘faka inthawina’ (Heb. 13:15) te chena hlân zêl tur kan ni.

Mi zawng zawng sual thawi nâna nun petu Lal Isua chuan a nun a pêk hma si, Juda-ho ni tina inthawina la hmangtute nun a hmuh khan a duh tâwk \hîn lova. Inthawina kha a paih lo nâng a, tih dân \ha zâwk leh pawimawhte a hrilh \hîn a ni. Marka 12:33-ah chuan ti hian a sawi a, ‘Amah chu thinlung zawng zawnga, hriatna zawng zawnga, chakna zawng zawnga hmangaih a, mahni inhmangaih anga vêngte hmangaih hi pumhâl thilpêk leh inthawina zawng zawng aiin a \ha zâwk..’ a ti a ni. A inthawina sâwngbâwl dân lam aiin a inthawitu rilru put hmang a pawimawh ta a ni.

Paula hian ringtute hi inthawina nung leh thianghlim hlân tûrin min ti a. Paula hun lai hian tûn lai ang thovin thlarau lam thil duh luat avânga taksa ngainêp zâwng leh tisa thil hre hma êm êm an awm. Chuvângin Paula chuan Pathian thil tum, kan taksa, rilru leh thlarau a puma humhim leh kan taksa thlarau thianghlim in chu inthawina nung ni tûra Pathian hnêna hlan a pawimawhzia a târlang \hîn. Kan thil neih hlan mai tâwk ti lovin kan taksa, rilru leh thlarau chu felna hriam hrei atâna hlân zâwk tûrin min zirtîr a ni.

Tin, inthawina Pathian lawmtlâk ni tur chuan nung leh thianghlim a ni tur a ni. Inthawi nân ran an hmanin a thi sa an hmang ngai lo. A nung lai ngei kha tihlumin an hlân a, an nunna zâwk kha an hlan avângin an tihlum mai a ni. Chutiang bawkin kan tisa (sual pu taksa) chu a pumin krawsa khenbeh tûrin Pathian hnênah kan hlân tur a ni. Tin, mi zawng zawng nêna inremna leh thianghlimna ûm rawh u, chumi thianghlimna lovin tuman Lalpa an hmu lo, a ti bawk a (Heb. 12:14). Chutianga kan inhlan hnu chuan khawvêl dân anga awm a theih tawh lo va, kan rilru pawh a thara awm a, danglam zêl tur a ni.

“He khawvêl dân ang hian awm suh ula; Pathian duh zâwng, a \ha leh lawm tlâk leh, \hat famkim chu in hriatfiah theih nân, in rilru a thara awmin lo danglam zâwk tawh rawh u.” Rom 12:2.

ATTACHMENTS