ISUA KRISTA THAWHLEHNA HNATHAWH

(EASTER SUNDAY THUCHAH) - Rev. Lianchhûnga Khiangte

Kum 1957 khân California atanga thlâwk chhuak thlawhtheihna pakhat chu vûr ramah a tla a, thlawhna hnathawktute zînga pakhat Lieutenant David Steeves-a chu vânneihthlâk takin a dam chhuak hlauh mai a. Ni 54 zet hnuah chuan khaw pakhata lo vâk chhuakin chuta tangin a in leh lo awmna California chu panpui a ni a. A hna ngai thawk leh tûra a han in-report chuan an lo pawm thei tlat lo mai a. A I.D.leh lehkha pawimawh zawng zawng a hloh bâkah amah hriatpui tûrin dam chhuak mi dang an awm si lo. Nimahsela kum 20 zet a vei hnuah, kum 1977 khân chu vûr ram pal tlanga kal tlangvâl rual (Boy Scouts)-ho chuan thlawhna chhia chu an hmu chhuak hlauh mai a. Chu thlawhna chhia chu Lieut. David Steeves-a tân chuan thlawhtheihna tlaa dam chhuak a nih ngei thu finfiahtu pawimawh a lo ni ta a. A hna ngai pawh a vuan leh thei ta a ni. Chutiangin, thlân ruak hian Lal Isua a tholeh ngei a ni tih a puang chhuak a ni. A tholeh ta tih mit ngeia hmututen a thawhlehna thiltihtheihna an chang a; mita hmu ve pha lo keini pawhin chu thawhlehna azârah chuan hnehna kan la chang zêl a nih hi. Isua Krista thawhlehna hnathawh langsâr zual i han thlîrho teh ang u:

1. Tlanna hnathawh famkimna a ni: Pathian Thu chuan, "Chu Isua chu kan sual avângin mantîrin a awm a, thiam kan channa tûrin kaihthawhin a awm bawk a," tiin min hrilh a (Rom 4:25). Pathian laka mitthi kan nih tawh avângin a rawn thih ve a ngai a; mi nung kan nih lehna tûrin a nun a, a thawhleh a ngai a ni. Lal Isua thawhlehna pawimawhzia hmu chiangtu Tirhkoh Paula chuan, "Krista kha kaihthawhin a awm loh chuan kan thuhril hi engmah lo a ni ang a, in rin pawh engmah lo a ni bawk ang," a lo ti hial a ni (I Kor 15:14). He thil pawimawh tak hi chhunzawmin khawvêla Baptist Kohhranhote chuan serh-sâng tih mâkmawh (ordinances) pahnih kan nei a. Lalpa Zanriah kîlin thihna a hnehna taksa leh thisen aiawhin chhang leh uain kan chang thîn a; tin, thihna, thlâna phûma a awm leh a thawhlehna kan tâwmpuina chu tuia inhnim phûm leh tui atanga lo tho chhuakin, baptisma changing kan puang chhuak a ni.

2. Sual thihsana Kristaa nun thar neihna a ni: Tirhkoh Paula khan Lal Isua kha a dam laiin a tawng lo ni tûr a ni a. Nimahsela a chanchin thangva chu a tân hriat loh rual a ni lo. A hriat chin chu a thitih zawng kha a ni. Juda kal sual thenkhatten Pathianah an be zui tih thâwm a han hria chu a thin a ur takzet a ni. A ngaih dân chuan, Isua chu Nazareth tlangvâl krawsa khenbeha awm, Rom sipaiten tham lo leh hnehsawh taka an thah a, thlâna an zalh tâk, an sawi zêl dânah phei chuan a dam laia a zirtîrten a ruang an rûk bo tâk kha a ni mai a. Mi lâr (celebrity) satliah boral tawh zirtîrna zuia Pathiana be tûr hian a chipui Judate kha a phal thei lo a ni. A mawh lo ve. Amaherawhchu, Damaska khaw daiah chu Isua chu a hnênah a rawn inlâr ta mai a! Mit del thim vek khawpa a êngin a han chhun thlûk ni chuan Isua hi a tholeh a, a nung ngei a ni tih a hmu chiang ta. Chumi ni la la chuan a nun hi a inlet thawk mai a ni (Rom 6:10-13). Isua Krista thawhlehna hi sual thihsana nun thar nei tûra mihring nun thlâk danglam vek theitu a ni a. Chak lo tân chakna a ni a; phatsantu mi dawihzep te pawh 'Khawvêl chawk buaitute' tih tûr khawpa huaisena siam theitu a ni (Tirh 17:6).

3. He khawvêl piah lam atân beiseina min pe: Europe rama indona râpthlâk Crime and War (1853-1856) lai khan Sâp sipai tleirâwl tê pakhat chu puan inah thia chhar a ni a. Inkahna hmunah na taka kah hliam a ni a, thi mai dâwna inhriain puan inah chuan a vâk lût a, a Baibul keuvin a chhiar nia hriat a ni. Bawkkhupa thiin Baibul in keu laiah a kut a lo nghat a. A thisen chuan a kut leh Baibul chu a lo char zawm chial a. A kutzungchal chuan Chanchin |ha Johana ziak 11:25 thua Lal Isua thu sawi, "Kei hi thawhlehna leh nunna chu ka ni; tupawh mi ring chu thi mahsela a nung reng ang," tih tak hi a lo kâwk a ni an ti. Krista mitthi zing ata kaih thawha a awm hian ringtute thawhlehna kawng a hawng a, amah chu muhilte thawh hmahruaitu a lo ni ta a (I Kor15:20-23). Chumi zârah chatuan nunna neiin thihna piah lamah chatuan nun beiseina nghet tak kan nei a ni (I Tim1:10b).

4. He Lei dam chhûng atân pawh beiseina min siam: Isua Krista kha kaihthawhin awm lo sela chuan sualah kan la awm reng tihna a ni ang a, Kristian nih hian awmzia a nei miah lo vang. Mitthi tawhte chu, Kristian leh Kohhran mi tak pawh ni se, an boral mai dâwn a ni (I Kor15:16-17). Pathian Thu chuan tûn dam chhûng chauhva Krista chunga beiseina neitute chu mi zawng zawnga khawngaihthlâk ber an nih thu min hrilh a (I Kor15:19). A chhan chiang tak chu, mihringin thihna a pehhêl thei si lo. Thlamuanna nei lova thih ni hmachhawn chu a râpthlâk êm a ni. Tin, chu chang a ni lo. Thihna piah lam ram, chatuan nun beiseina nei lo mite bawk hi he khawvêl hringnun kawng chhuk chho pal zuam lote anni fo bawk. Isua a tholeh ta tih hriatna hian chatuan hawlh tlang beiseina min siamsak a, chu beiseina chu tûn kan dam chhûng ngei hian a intan a ni. Chuvâng a ni zirtîrte beidawng darhsarh vek tawh pawh kha beiseina thar nên an inkhâwm leh tâk. Tirhkoh Petera chuan, "Kan Lalpa Isua Krista Pathian leh Pa chu fakin awm rawh se. Ani chuan a khawngaihna nasa tak ang zêlin, mitthi zing ata Isua Krista thawhlehna avângin beiseina nung hmu tûrin min hring leh a...chumiah chuan nasa takin in hlim a ni, tûnah (a tûl chuan) thlêmna tinrêng avângin lungngai rih mah ula," tiin a lo puang chhuak a ni (I Pet1:3, 6).

Khawvêlah sakhaw hrang hrang a awm a. Kristianna danglamna chu tholeh Lalpa kan ring hi a ni. Amah ngeiin, "Kum khuain, khawvêl tâwp thleng pawhin, in hnênah ka awm zêl ang," tiin min tiam a (Mt 28:20). Chuvângin, tholeh Isua rin chu kan hnêna awm Pathian biak a ni a, a danglam a ni.

Khawvêlah sakhaw hrang hrang a awm a. Kristianna danglamna chu tholeh Lalpa kan ring hi a ni. Amah ngeiin, "Kumkhuain, khawvêl tâwp thleng pawhin, in hnênah ka awm zêl ang," tiin min tiam a (Mt 28:20). Chuvângin, tholeh Isua rin chu kan hnêna awm Pathian biak a ni a, a danglam a ni. Chu ngei chu a ni, kan hmâa mihuai kal tate mi danglama siam a, 'khawvêl chawk buaitu' nih hlawhtîr hialtu chu! Pathian nung an hnêna awma avâng chuan huaisenna leh thahnemngaihnain an khat a; Amah chu chung lam mi a nih avângin a mi thianghlimte nunah he khawvêl hian hmun a chang thûk thei ngai lo a ni (Joh 3:13; 6:51; Heb 11:13). Chhiartu zawng zawngte, Krista thawhlehna hian in nunah thiltihtheihna a tharin rawn thlen se la. Pathianin malsâwm theuh che u rawh se. (Thu tha tak min ziaksak leh ta, a va lâwmawm êm...ED).

ATTACHMENTS
2022 GNM Result chhuakah - Nursing School, CHS Serkawnin result tha tak an nei

2022 GNM Result chhuakah - Nursing School, CHS Serkawnin result tha tak an nei

Tunhnai khan Mizoram Nursing Council-in General Nursing Midwiferym(GNM) result 2022 a ti chhuak a. Tun tum result tih chhuah-ah hian School of Nursing, Christian Hospital Serkawn chuan result tha tak neiin, Final Year (III Yr) ah top ten-ah pahnih an lang a, Mizoram pum-ah pangana, pariatna an hauh a ni. 2nd Year atangin pahnihna leh pathumna an hauh a, First Year atangin mi 4 Top Ten-ah hian lang bawkin, 4-na, 5-na leh 10-na pahnih an hauh a ni. …

ABC Rorel leh Inkhawmpui neih a ni dawn.

ABC Rorel leh Inkhawmpui neih a ni dawn.

Mizoram Baptist Kohhran – Area Baptist Council (ABC) Rorel leh Inkhawmpui chu November 25-27, 2022 chhung hian ABC 16-ah a rualin neih a ni dawn a. November 25, zirtawp zan atangin Inkhawmpui hi tanin, vantlang Inkhawm atan hman a ni ang. Inrinni nilengin ABC Rorelna neih a ni ang a, ABC Executive Committee thute bakah Pastor Bial  atanga Agenda lut te, ABC kal tlanga Assembly 2023-a thlen tura chhawpchhuah te ngaihtuah a ni ang. Zanlam-ah Pathian Biak Inkhawm awm lehin, ABC thenkhat-ah inkhawm banah Inpawlhona leh Zaikhawm programme an siam bawk. November 27, 2022 (Pathianni) Chawhma inkhawm hi Kohhran Upa Ordination Service atan hman a ni ang a, Pastor Bial 66 atangin Kohhran Upa  162 nemngheh tur awmin, anmahni awmna ABC theuh-ah nemngheh an ni ang. Pathianni chawhnu-ah Lalpa zanriah (Sacrament) kil ho a ni ang a. Zan lamah Vantlang Inkhawm awm lehin inkhawm banah Inkhawmpui an tiak tawh dawn a ni. ABC Rorel leh Inkhawmpui neihna hrang hrang leh Thupui, Kohhran Upa nemnghettu turte chu hetiang hian report kan dawng:- …

Mizorama Chanchintha Thlen Documentary Sub-Committee Thutkhawm neih a ni.

Mizorama Chanchintha Thlen Documentary Sub-Committee Thutkhawm neih a ni.

November 23, nilaini chawhnu dar 1 khan Committee Room No.01, Headquarters Office ah Assembly-in  ‘Mizorama Chanchintha lo thlen dan Documentary Film buatsaih ni se’ ti a a rel bawhzuitu Sub-Committee, Communications Department Committee kal tlanga din chu a vawi 6-na atan an thukhawm a. He thutkhawmna ah hian Documentary Film siamna atana Firm thawhpui tura biak MSPACE Production atangin mi 2 lo tel ve bawkin hmalak chhoh zel dan tur ruahmanna hrang hrang siam a ni. …