- Rev. H. Lalthlamuana, Principal, JBS

Kristian nun hi tawitea sawi zau theih, sawi zawh sen si loh khawpa huap zau; nun hawl kim tak a ni. Thil langsar zual leh ngaihmawh zawng kan lawr mai ang chu. “Kristian” tih chu “Krista Zuitu” a nih ang takin “Kristian Nun” chu “Krista Zuitu Nun” tihna a ni leh mai. Christian zirtirna (education) pawhin a tum ber chu Krista anna lama mi thanlentir a ni. Chuvangin Kristian nuna than z>lna chu Krista hnung zuina leh Amah anna lama than len z>l hi a ni a; Krista mizia nuna lanchhuahtir z>lna hi a ni bawk. Thirhipthei (magnet) nena thir dang kan dah kawp reng chuan eng emaw chen hnuah thir chu thirhipthei-ah a nihna hloh si lovin a chang ve thei deuh roh a ni. Mi, Krista nena a l>n dun renga inlaichinna tha an neih chuan mihring a nihna hloh si lovin Krista anna lamah a thang liana Krista mizia amahah a lang chhuak thin.

Kristian nihna chu inlaichinna (relationship) a ni kan ti thin. Miin Krista nena inlaichinna tha a neih chuan Krista hnenah chanvo a nei a (Rom 8:16). Hmeichhia chu a pasal ta ni tura rilru siam felin leh khaw dang hawi tawh lo tura a pasal hnena a inpumpek ang hian, mi Krista hnenah a inpumpek anga, tichuan inlaichinna nghet neiin Kristian nun bul a tan nghal a ni. Grape hrui peng chu grape bawk a ni a, grape rah a chhuah thin. Chutiang bawkin miin Krista Isua a zawm that phawt chuan rah duhawm tak a chhuah mai dawn a ni. Hetiang inlaichinna hi a ni “piantharna” kan tih thin hi.

Piantharna chu khual zin tur anga Vanram ticket book ang ngawt a ni lo. Grape hrui leh a zawmpui p>ng kan han tehkhin naa chutiang ang siar siar chu a ni lem lo. Kristian nun chu vawi lehkhata famkim leh Lal Isua anga fel leh thianghlim famkim a ni lo va, ni tin chhawm nun ngai a ni (Philippi 3: 12-14). Krista rilru pu turin a zir anga, a thawk rim tur a ni. Chutichuan Pathian Thlarau Thianghlimin Krista anna lama thang lian turin a a tanpui ang (Rom 8:26-27). A thu zir leh tawngtai leh mi dai thuk zawkte thusawi leh ziak atang tein Krista duh zawng kan hriat belh zel thei thin. Krista ngaihsan zawng ngaisang tur te, Krista hnathawh chhunzawm tur te, Krista tana inserh thianghlim tur te, Krista tarmit vuaha khawvela hawi vel tur te leh Krista duh dan hre turin tan lak a ngai.

Mihring chu a dinhmun dik tak luah thei lova sualin amaha thuneihna a neih thinna lak ata zalenin “thiam chang” a lo  ni ta a (Rom 6:5f). Amaherawhchu thiam channa nei mah ila Krista famkimna amaha lang chhuak tur leh puitling zel turin kawng a zawh tan dawn chauh a ni. Nitina thianghlimna lama hmasawn ngai a nih avangin Kristian nun chu goal engemaw va thlen rawihna ni lovin hmalam pan mek nun a ni. Mihring pumpui ihthianghlimna a ni a, taksa rilru leh thlarau lama hmasawn zelna a huap. Bible theologyah chuan taksa rilru leh thlarau thliar hranna a awm ngai lo. Taksa leh rilru thianghlimna huap tel lo thlarauna hian kan ram a tibuai rei ta hle mai. Mahni intodelh te, nunphung tha lovin a hrin chhuah hrisel lohna laka fihlim tum te, inlaichinna tha nei tura midangte chunga rilru dik put te, khawtlang leh sawrkar tha nei tura rilru dik put tum hram hram te hi a pawimawh.

Kristian Nun Kawngah hian tuarna leh malsawmna hi a kal kawp tlata, a dai thuk zualte tan phei chuan tuarna leh channate pawh malsawmna hnarkaitu a ni zela, thliar hran hleih theih pawh a ni lo fo. Krista nena kan inlaichinna chhawm nun leh a hnung zui kawngah hian tuar leh chan a tul chang te a awm thin. Chutianga inlaichinna chhawm nun kawngah leh Amah avanga tuarna kawngah mi a rinawm chuan lawmna leh malsawmna a lo thleng bawk thin. Kristiante hi khawvela kan awm chhung hian thil tha lo tam tak lakah kan fihlim bik lova, Pathian lak atanga a bik taka venhimna hi kan chang bik kher lo. Mi dik tak hi rilru hah leh mangang takin an awm ve fo. Amaherawhchu misualte tuarna chu kan thleng atanga meia chawhmeh kan tla lut ang hi a ni a, Krista mi felte tuarna chu kan thleng atanga thleng mawi taka chawhmeh chhawp chhuah ang  hi a ni. Thihna hial pawh hlawkna a ni tlat mai (Phil 1: 21). Tahna ruama Amah rinchhan tur leh lawmna tura lawm theihnghilh loh hi a pawimawh hle mai. Tin, Pathian hian malsawmna hi a ui lova, hausakna pawh Ama ta vek a ni. “Pathian leh US Navy rawng kan bawl kawp thei lo a nih chuan, US Navy chu kan thlauthla mai ang” ti rap khawpa ram danpui hremna pawh tuar huam Meloons Family te sumdawnna hlawhtling tak te chanchin hi a ropui teh a nia. Zofate zingah pawh Pathian duh dana sumdawng hausa an awm. Kristian lo pawhin Pathian Thu anga thil a tih chuan a hlawkpui tho tho. Ringtu dik tak nun kawngah chuan hausak leh retheiha awm dan thiamna a awm.

Kan ramah hian Thlarau hnathawh (emaw harhna) leh “hlimna” hi kan hmehbel chawk thin, mahse a ni vek lem lo. Kan ram sualna avanga lungngaih leh zahna runpui te hi kan ram kristiante nunah hian lo thleng zawk se ka va ti em! Hleihneihna leh duhamna te hi hua ila thinrim ila, sual sulhnu chhe tak tak avang te hian lungngai ila, kan nun belh chian dawl lo te, Kohhran leh Kohhran inngeihlohna avang te, bawlhhlawh paih lohna tura let phung avang te, mimal leh hnam pum leibat tam lutuk avanga zah ngawih ngawihna te hi kan ram Kristiante nunah thleng rawh se. Hetiang zawng deuh pawh hian Israel fate chu an harh ve bawk thin kha. Bible-ah hian tap tur te, lungngai tur te, mangang tur te, zak tur te, inchhir tur te a fuihna a awm ve tlat. Zahna tura zak lo, manganna tura mangang lo, lungngaihna tura lungai lo Kristian tam tak kan awm awm e. Kristian nuna harhna dik chang tur chuan Kan ram, khawtlang, Kohhran leh chhungkua bih chiana mangan, lungngaih leh zah ngawih ngawih a va hun em !

.....................

Read More Article/Sermon : Click on this link : Articles/Sermon

ATTACHMENTS