- Ms Dawgliana
Mizo ten kan Chaw pui ber BUH hi Vairam a tanga thar chhuah bakah Sorkar laipui tanpuina sumah kan innghat a. Chuvangin kan ram-ah hian Buhfai chauh nilo kan nitin ei tur mamawh thawh chhuah lamah hian Intodelh chu sawi loh kan la pachhe hle ani. South Asia ram Chaw khawpkham nei lo indawt dan tehna (World Hunger Index) record-ah chuan India ram chu 66-na a la ni hem mai. Chu chu a ram chhûng naupang 50% vel hi chaw khawpkham nei lovin, riltamin, nitin an awm thin tihna ang a ni. India ramah Mizoram state chu khawpkham thar chhuah tehna danah State dang 6 te nên ei/bâr thawhchhuah kawnga chhût ngaihna hriatthiam loh khawp dinhmuna awm kan la ni. (India_State_Hunger_Index).
He tehna dân hian tun maia kan ei leh bâr thar chhuah chauh ni lovin kan thar chhuah leh zêlna tur kawng kuak dân a chhût tel a ni. Chuvângin hetiang ang dinhmun derthawng laka chhan chhuahna hna hi thu chauh ni lo, a taka hma kan lâk hi kan zavaia mawhphurhna a ni. Intodelh loh lutukna hian nghawng tha lo tam tak a nei a, chûng zinga pawi tak chu, Beidawnna khurah mihring a hruai lût a, sual engpawh ti tûrin a hruai pêng a. Tin, Chaw tha ei tur kan neih loh avânga kan taksa raldo khawl lo chak lo chuan natna chi hrang hrang a thlen a, mihring dam chin a ti tawi bawk.
Mizoram zim te hi lo thlir ta ila:
Kan rama kan neih ang hi mi ramin an neih phâk loh ei tûr tha tak tak kan nei a. Kan ramah hian chhim thal leh hmar thal leh chhak leh thlang zimte pawh hi a boruak in ang lovin, khawvêl a thlai kan hmuh theih ang chi tam zawkte hi ei khawp an thar thei vek a ni. Tin, ram dangte ang lo takin mihring cheng zaa sawmkua (95%) dawn lai hi Kristian kan ni a. Pathian mite avângin 85% aia tamin ziak leh chhiar kan thiam a. Lal Isua Krista chuan a thu ngaithla tute hnêna a zirtirte ti tura a tih kan hmuh pakhat chu “Nangmahnin eitur pe rawh u”, Mat 6:37- tih a ni a. Hei hi kan Ramchhung Mission pawimawh, kan thlahthlam êm êm, kan Puan In hmun khenna tihngehna tur pawimawh tak pakhat ani. Ringute chuan kan ei tur mai bakah midangte tan pawh thawh chhuahsak hi Pathian rilru a ni kan ti thei ang. Chu chu Kohhran ang a kan din ngheh nân leh Pathian lam kan hnaih theihna atân pawh thil tangkai tak a ni. Johana 6:26-a Isua thusawi atang pawh hian a pawimawhna kan hmu thiam thei awm e. ‘Engti kawngin nge ei leh bar khawpkham nei tur hian Ringtu kan nih ang a, kan mawhphurhna’, tih hi kan chhui chian fo a ngai a ni. Chuvângin – Ei-bâr khawpkham neia rilru muanga rawng kan bâwl theihna tûr kawngahte hian Kristian kan nih anga kan mawhphurhna kawng pawimawh tak a ni. Hetiang hian i lo thlir teh ang:
Social:
1. In kungkaihna tha vawn him:
Kan rama nghei lo leh tlachham lutuk lova kan awmna chhan pawimawh tak mai chu, Central tanpuina bâka kan inthenawm kawven thatna leh kan in hriat tlang tlânna hi a ni kan ti thei ang. Hei hi a Pathian thu hlein a hriat an i. Samari mitha tehkhin thu hmanga Lal Isuan vengte hmangaih a sawi kha a taka kan lantirna (Practicable) deuh mai a ni a. He chîn dân tha tak hi Kristian kan nihna anga vawn nun that zêl hi kan mawhphurhna a ni. Kan ringtu puite leh kan thenawm khawvêng te ei leh bar harsate rilrua hlauhthawnna nasa takin a chhawk a. A that lohna lam pawh awm thei mahse ei/bâr nei mang lo leh a leina pawh nei mang lova kan awm pawhin hei hian chhungrilah thlamuanna min pe tlat thin a ni. 2 Kor 9: TT. 2:44-45, Heb. 13:16. Mizoram ringtute chan Malsawmna chikhat a ni phawt mai. Hei ringawt pawh hi chhui zaua ziah tur tam tak a awm thei ang.
2. Mihringpuite tana inpêkna:
Tunlai khawvel kalphung hian mahni mihringpuite din chhuah vena ai chuan kei hian a tam thei ang ber /Phek li-naah chhunzawm a ni. chang ila tih duhna ruahman avanga hma lakna a nasa tial tial a. Mi hausa ten Pathian thu kal pela nawm chenna an ûm luat avângin thil thar chhuah engkim ei leh bar leina tur chu a sawrfu a, mi tlêmte kutah an dah a. Thil sem dawng ve lo tura invauna leh thil tha lo ngawih bo pui tura in thamna-in pâwl zawng zawng a chenchilh a, Mizoram pawh min fan thuk ta hle mai. Hetiang chîn dân hian inhriatthiam lohna leh indona a thlen fo thin. Chuvângin ram leilung leh nungcha chu sawi loh, Pathianin a anpuia a siamte in ngeih lohna a thlen ta a ni.
Amaherawhchu rethei zâwkte rahbehna chuan helna, in kidnap, tualthahna-te a hring thin a ni tih an hria a. Nek chêpte tuarnain nghawng tha lo tak a nei dâwn a ni tih hriatna chuan pâwl anga midangte tanpuia, dawm kang tûra hma lâkna a hring a, a tha tho e. Mahse Pathian chuan mitinte thinlung taka a rawngbawl tûra an mawhphurhna a ni tih hriatna atanga kan thawh chu a duh ber a ni si. Pathian atanga chhuak hmangaihna leh duhsakna rilru nêna thawh a nih loh avângin retheihna avânga tuarna chu nitin a pung tial tial si a ni. Kristian ram thenkhatin ringtute tih chak nân chûng pâwl pawisa tling khawm chu anmahni rama Kristian pâwlte nên thawk hovin tangkai takin an hmang thung a, a hlawhtlinna tam tak an hmu a ni.
Keini pawhin Nepal rama chutiang hmalakna hlawhtlinna chu a tak hmuh phak rengin kan nei a ni. Chuvângin ei leh bar dinhmun hima kan awm theih nân ram rorêl khâwl vuantute leh thiamte thu leh hla a taka chantir tura hmalak hi Kristiante mawhphurhna pawimawh tak a ni tih hi i hre reng ang u. Hma lakna dik hian hruaitute thil tha ti tûrin min fin chhuah theih bakah dik lohna te a ti ralti thethin a ni. Kohhran hrang hrangten kan hmalâk hona a tân pawh thil tûl hmasa leh pawimawh tak a ni ang.
Lalna leh thuneihna hman dik lohna bul pakhat politics siam thatna lama hma kan lâk laiin, hetiang lamah hian inzawmkhawma hmalak hona neihte hi a tûlin a pawimawh êm êm a ni. Kum li/nga dana thar thawh hluai lovin, thathlah miah lova kum tluana hmalak ngaihna tûl tak, kan thawhlawm leh tha leh zung sênna atan pawha insen kan phal leh zual a tûl a ni. “Kan mite chu tlakchham an neih ngai loh nan hna tangkai thawka inhmang reng turin fuih la, an awm mai mai tûr ani lo”. Tita 3:14 #
Read More Article/Sermon : Click on this link : Articles/Sermon
