- LH. Siamchhunga, Zote S
Chhipphir Pastor Bial rorel bawhzuiin bial chhung Kohhran hrang hrang- Chhipphir, Zote leh Bualpui ‘V’ atanga member 19-te chu HATIM-a Work Camp nei turin November 25, 2013 (Thawhlehni) khan Bialtu Pastor Quarters-ah kan kal khawm a. Upa Vanlalchhuanan tawngtaina a neih hnuah, Pickup-in HATIM (Pukpui Kawmzawl) panin kan chhuak a. Tluang taka kalin chawhnu lam-ah kan thleng a. BCM Project pawimawh tak HATIM Campus kan han thleng chu rilru a khawihin kan hotute ruahmanna leh hma lak dan te chuan min hneh hle mai. He Campus hi mimal ram hrang hrang lei khawm a ni a. Boy’s Hostel tur Assam Type chu peih fel thawkhat a lo ni tawh a. Girl’s Hostel tur chu Sawrkar lam atangin Contractor ten an sa dawn niin min hrilh a. Infiamna tur Field zau tak laih mek a ni bawk a. A ram chhungah hian plan fel takin Quarters leh in kal pawhna tur kawng siam mek a ni bawk a. A hmun a nuamin hma lak tawhna hrang hrang han hmuh hian thahnemngaih a na in luah theiha peih fel hun a nghahhlehawm hle mai.
Kan in dah fel a, rei lote kan hahchawlh hnuah kan hna thawh tur Dining Hall (ft. 70-a sei, ft.30-a zau) sak hna chu kan tan ve nghal mawlh mawlh a, ni thum leh zan thum chhung chu zing atanga hna tanin tlai ni tlak dawn thleng kan thawk thin a, hahthlak viau mahse kan hlimin nuam kan ti tlang hle. Work Camp kan neih chhung hian Headquarters lama kan hotu - Rev Lalbiaksanga Chinzah AGS i/c Service, Dr.Chawngthanpari, Principal HATIM leh Audio Visual lam hotuten min rawn tlawha kan lawm hle. Chawhmeh atan Work supervisor-in (Pu Rinpuia’n) Broiler âr min lei sak bawk. Riak lut meuhva HATIM Work Camp nei hmasa ber kan ni hi a lawmawmin kan bial hruaitute fel zia leh zirna hmanga Chanchin Tha rawngbawlna an lo man zia ka hmuh hian an fakawm hlein ka hria. Kan Bialtu Pastor, Rev C.Vanlalmuana pawh a lâwn sâng leh hah berah a tang a, Work Camp min ho thei hi a fakawmin a entawntlak hle. Hetiang bialtu pastor kan nei hi kan chhuang hle a ni.
Hma lak zêl dan tur han en hian Bial, Kohhran leh FOD hrang hrang ten thain emaw, sumin emaw, tanpui thei ila a tul hle mai. Ram dang tawng hrang hranga kan thalaite tir chhuaka Pathian thu sawi tur leh Missionary ni turin tawnghriatloh ni lovin sap tawng thiam (Tawng hriat angai si a,) S.Vanlaiphai khua Pu Saikhuma, Zawlnei lo sawi ang khan, “Nakin-ah chuan Chanchin Tha te hi thlawhtheihna hmangin an la hril ang” a tih kha a thleng chho zel dawn chu a nih hi. Zir thiamna, finna ringawt chuan - Ramhuai fing tak, sual tak kan chher chhuak tam mai dawn a. He HATIM atang erawh hi chuan taksa, rilru, thlarau huap vekin mihring nunphung leh nungchang siam that leh tangkai hmantlak ni tura chhuah a tum ber a ni. Tunah hian HATIM zirlaite leh zirtirtute tan mimal building, cheng sing tela luah man sên zêl a ngaih avangin Kohhran hoten theih tawp chhuahin he hmun pawimawh tak hi luah a nih thuai theih nan tha i han thawh thuai thuai teh ang u.
Tluang taka ruahman ang a kan thiam tawka kan thawh hnuah Nov. 29, 2013(Zirtawpni) chawhma dar 11-ah Principal, Dr. Chawngthanpari’n tawngtaina a neih hnu-ah kan Work Camp-na hmun (HATIM Campus) chhuah sanin tlai dar 5-ah dam takin kan bial Chhipphir kan thleng leh ta a ni. Kan theih ang leh phâk ang tâwka rawngbawl hna min thawh tirtu LALPA chu fakin awm rawh se.
Read More Article/Sermon : Click on this link : Articles/Sermon
