- Upa KMS.Dawngliana

Kan sawi fo tawh angin kuminah hian Mizoram Baptist Kohhran chuan Beirualah Kristian Nun tih thu kan zir dawn a, a phurawm hle. Kristian nun hi zir ngai tak, kan hriat sa deuh vek, kan thiam hleih theih si loh a ni a, chuvangin zirlai har tak a ni. Baptist Kohhran hi kan vannei a, mi thiam pui pui kan ngah tawh a. Kristian nun pawh zir tham taka ziak thei kan nei nual tih hi a bu kan zir tak tak hunah kan hre ngei ang. Tun tumah hian Book Review pangngai anga review lovin, Kohhran tinin kan zir dawn avanga a zirtu turte lo kam keuna leh zir man awm tak a nih dan tur ‘Zirlai bu leh a chhehvel’ kan thlir lawk mai dawn a ni.

A ziaktute: 

Beirual Thuzir hi a chang chuan mi pakhatin thlirna hmun khat atanga thlirin zirlai zawng zawng a ziah chang a awm a. A chang chuan mi pahnih/pathumin an inziahtawm chang a awm bawk a. A eng zawk nge kohhrante tan tha a, tha lo teh thiam a har. Kuminah hian zirlai 10 chu mi 5 in pahnih te tea insemin an ziak a, zirlai thenkhat kan duh zawng tak a awm ang a, thenkhat chu khawp kham mang loh pawh a awm thei mai thei. Hetianga thuzir bu buatsaih a nih dan hi Kohhranhoten hre vekin zir ila a tangkai ang e. Tuna Headquarters Office-a kan hruaitu pawimawhte tel vekna Publication Board member 10 velin ngun takin an thlir a. Thupui atan Kristian Nun thlan fel a nih hnuah tum khat thuzirah chuan zir zawh s>n rual a nih dawn loh avangin kan ram leh Kohhranin a mawmawh deuh deuh tura nia hriat thupui 10 a thlang chhuak leh a. Chu chu mi pakhatin zirlai pahnih zel ziak tura insem fel thlapin an hmachhawn ta a ni. Kum dangah chuan Committee-in thupui/a bu hming tur a thlang a, a ziaktu tura ruatten a chhung thu an thensawm a, an ziak thin tlangpui a. Kuminah chuan eng thupui mah hi mimal duh dan rawn chhawp chhuah a awm lo va, thupui zawng zawng hi Committee in lungrual taka a thlan sa vek an ziak mai a ni a, tha thawkhat hle tura ngaih a ni.

Tin, a ziaktu tur thlan thuah pawh a fimkhur a. Theologian zingah pawh kum lama upa deuh leh tawnhriat ngah tawh deuh te, hotu chan chang tawh leh chang mek te atangin ngun takin a thlang kher a ni. Hetiangin:

Zirlai 1-na  Kristian nun awmzia                - Rev. C. Ngurhnema Zirlai 2-na  Nun danglamna           - Rev. C. Ngurhnema Zirlai 3-na  Rinnaa nun                              - Rev. Dr. V. Laldingliana Zirlai 4-na  Pathian nena inpawl nun  - Rev.Dr.V. Laldingliana Zirlai 5-na  Thianghlimna nun         - Rev.H. Sangchema Zirlai 6-na  Taihmakna nun             - Rev.H. Sangchema Zirlai 7-na  Rinawmna nun             - Rev. F. Ramdinmawia Zirlai 8-na  Pe chhuak nun      - Rev. Lalbiaksanga Chinzah Zirlai 9-na  Tuarna nun                               - Rev. F. Ramdinmawia Zirlai 10-naSiam thatu             - Rev. Lalbiaksanga Chinzah A chhung thu:

Kristian nun awmzia atanga tanin thupui kan zir tan dawn a. Eng thupui mai pawh hi mal din thei thiau, a hranpa taka zir tham vek an ni a. Chuvangin a indawt dan turah kumin Beirual thuzir bu buatsaih dan sawisel bo ni lo mah se, hei aia thaa thliar fel dan chu a awm chuang lo mai thei. Zirlai hmasa berah Kristian nun chu tihian hrilhfiah a ni a, “Kristian nun chu mahni duh dana nung tawh lo va, Isua Krista rinchhana nun hi a ni”tiin. A ziaktu hian Tirhkoh Paula nun chu entawn bera neiin pawmawm tak, him tak bawk siin kawng hrang hranga min zirtir hnuin “Kristian nun chu thil tisual thin lo leh tisual thei lo nun a ni” tiin a khaikhawm a; hei erawh a har ta talh mai a. A bu pum zir hnua hriatfiah turin a ziaktu hian thiam takin min chhawp chhuahsak a ang hle.

Kristian nun hi a chho zawng leh a harsa zawnga en chuan huphurhawm tak mai hi a ni a; chu chu hriain kan zirlaibu ziaktute hian hahdam taka min zirtir a, a tawpa kristian nun tak taka min luhpui chu an tum lian ber a ni lawi si a, thiam tak an ni. Hei hi Kohhranho tan malsawmna a nih ngei pawh a beiseiawm hle. “Mizote hi thlarau mi ngais^ng tak, kan rawngbawlnaah pawh ‘a rau leh rau loh a’ inteh ching tak kan ni awm e. Thenkhat chu rau kan tumna lutukah Amah kan zui Lal Isuan engtin nge a tih, tih pawh ngaihtuah chang l>k  lo va, mahni rau rauva rau veng veng mai pawh kan awm nual awm asin! Kan kristian nun hi engti fakauva rau tur nge- dikna, rinawmna, takna, lawmna leh dawhtheihna ram thleng lo va mahnia rau veng veng tur em ni ang? Mahni inchhung khur, ni tin eizawnna kawng kan zawhna leh khawtlang huapa rauna kal k^na Biak in leh a chhehv>la rauna, lamtuala a titha ber niawm taka Pathian fak a, a bak ngaihtuah thleng l>m lova raunaah hian kan kristian nun hi a tawp mai a nih chuan kan tidik hauh lo vang le.

Chutichuan Kristian nun awmzia man fuh tumin, chu nun chuan danglamna eng emaw tal a keng tel tih zir chhuah tum ila. A tak taka kristian nun hi kan practise dawn chuan rinna kal a ngai tel tih pawh hi kan zirlaibu chhungah hian a awm a, chutiang tur chuan Pathian nena inpawl reng nun hi vawn nun tlat zel tura mawhphurhna kan nei tih pawh zir chhuak ang u. Chu chauh ni lovin Kristian nun chuan kentel tam tak a neih zingah thianghlimna hi hmaih chi miah loh a ni a, kristian nuna thianghlimna kan sawi hian pawn lam intihfaina leh invawn felna piah lama chhungril lam nun thianghlimna thlengin a huam tih hi beirual hmangin kan inhrilh nawn leh dawn a ni.

Tun dinhmuna Mizoram Kristianten Kristian nunin a kentel  peng hrang hrang zingah Rinawmna thu leh Taihmakna thu hi zir thar ngai tak niin a lang. He thu pahnih lian pui pui chhungah hian kan rawngbawlna leh kan ni tin nun hi a her vel reng a, chu chu kheh chhuak tur leh kheh chhuah huamin zir ila kan tan a tangkai ngawt ang. Kan ram dinhmunin a zir em avangin khawvel hmun danga kristiante tawrhna (tihduhdahna leh hmuhsitna etc) ang tuar ve tam lo mah ila, mahni tawk zelah tuar hian kan inhre ve hlawm hle bawk si a, chuvangin tuarna chungchang kan zir hmang hian Retreat neihna hun remchang a ni ngei ang.

Kristian nun ziaa tel tlat chu pe chhuaktu nihna hi a ni.  Chumi hmang chuan Kohhran pawhin he khawvelah rawng kan bawl a ni a, pekin lukhawng a neihzia te pawh zir thar leh turah in ngai ang. A tawp berah kristiante chu he khawvel natna chi hrang hrangin a bawm meka siam that hna thawktu tur, a fel lo lai tifel a, a kim lo lai tikim a, a pawp lai thawm phui tura ruat kan nihna hmangin zirlai kan khar dawn a ni. Siam thatna hmanrua kan ni thei hi lawm ila, hmanraw tangkai tak kan nih theuh theih nan Beirual zir nuam vek ule.

 Sawiho tur:

Kum thenkhatah Tualchhung Kohhran tina kan sawiho dan Headquarters-a report tur tih chang kan nei a. A thu a zirin hei hi a pawimawh a. Kuminah chuan Kristian nun kan zir dawn avangin khawiah mah hlan chhawn chi ni lo, mahni nuna seng luh nghal zel tur a ni dawn hi a thatna riau a ni ang. Kum dang ang lo takin kuminah hian sawiho tur zirlai pakhatah pakhat chauh zel chhawpchhuah a ni a, mahse zawhna chhawng nei a ni deuh vek thung. Zal>n takin, mahni nun nen a theih chin chin hmehbel zelin tangkai taka sawiho i tum ang u.

 Read More Article/Sermon : Click on this link : Articles/Sermon

ATTACHMENTS