Sap Upa leh Pu Buanga te Zoram zin kawng hautak

-Gilbert Renthlei

Vawiin hi Missionary Day a nih angin Mizorama Chanchin tha min rawn hrilhtu hmasa Pu Buanga leh Sap Upa te Mizoram rawn kal dan i han tarlang dawn teh ang.

Pu Buanga leh Sap Upa hi missionary atana lak a, lawng hmanga Mizoram rawn pan ding char char a rawn thleng hlawl an ni miah lo a. Zofate tana Chanchin Tha meichher rawn chhi tur hian harsatna tam tak an tawk a, Mizoram luh dan nasa takin an zawng a, British pachal tih takah an seh an thlah mai mai lo a, harsa takin Mizoram an lo lut thei ta a ni.. Chhiar zel rawh le

TLEIRAWL LAI ATANGA BUATSAIH Pu Buanga leh Sap Upa tia kan sawi mai thin FW Savidge leh JH Lorrain te hi tleirawl lai atanga inkawp chawt mai, inkawmngeih tak an ni a. Pu Buanga aiin Sap Upa hi a upa zawk a, mahse Pu Buanga hi piangthar hmasa zawk a, a thianpa Sap Upa hi Pathian hnenah hruaithlengin thlarau lamah chuan a thianpa hruaitu zawk chu Pu Buanga hi a ni awm e.

LONDON ATANGIN INDIA AH Kum1889-a mi hausa tawntaw, Robert Arthington-a’n Arthingthon’s Aborigines Mission a din khan Pu Buanga leh Sap Upa te hi missionary atan lak an ni a. Pu Buanga hi rawn thawkchhuak hmasa zawkin Dec 16, 1890 ah William Pettigrew leh Mr C-a te nen, an pathumin London chhuahsanin India ram an rawn pan a. Jan 21, 1891 ah Calcutta rawn thlengin India ram pana lawnga an zin chhung hian Pu Buanga hian Bengali a zir thiam hman hle. Calcutta atang hian Zew Zealand Baptist Missionary Society hmunpui Agartala kianga Brahmanbaria khua chu an pan nghal a. Hetah hian Rev De St Dalmas hovin rawng an bawl ho ta a. Tripura rama rawngbawla Agartala-a Mission Station bun tuminHemi kum tawp lamah hian Sap Upa pawh India ram rawn pan vein November 1891 ah Brahmanbaria khuaah Pu Buanga chu a rawn fin ve ta a, rawng an bawl tlang chho ta zel a ni.

Anmahni tirtu Robert Arthingtona duhdanin hemi tuma missionary rawn kalte hi pahniha inkawpin an kal hrang a. William Pettigrew leh Mr C-a te hi Manipur lama rawngbawl turin an kal chhuak a, Pu Buanga leh Sap Upa te pawh Mizoram chhim lam South Lushai Hills atanga lut turin ruahmanna an siam a, Chittagong lama kal tura sawm an nih bawk avang leh hei hi a kalkawng anih bawk avangin Jan 1892 ah Chittagong chu an pan ta a ni.

ZORAM LUH KAWNG BUM BOH Chittagong-ah hian Pu Buanga leh Sap Upa hian Mizoram luhchilh theih dan tur kawng an dap nasa hle a, Chittagong Jail-a mizo tang nia an sawite chu tlawhchhuakin an bia a. British Sorkar hotute chu Lushai Hills-a luh phalna te an dil a, mahse ram a la ralmuan loh avangin Chittagong atanga khawchhak lam mel 80 a hla Kassalong thleng chauh kal an phal sak a. he hmunah hian kalin thla 6 chuang an khawsa a, hetih chhung hian Mizote chanchin te zir chiangin Brojo Nath Shaha ziah ‘Grammar of the Lushai Language’ tih hmangin Mizo tawng te an zir a, helai hnaia Chakma ho zingah rawngbawlna te an nei thin bawk. Mahse eitur mumal a awm loh avang leh natna hrang hrang ten a tlakbuak avangte, British Sorkarin Kassalong bak pelh a phal tlat loh avangtein kum 1892 June thlaah Kassalong hi chhuahsanin Calcutta lamah an let leh ta a ni.

Kum 1892 October thla thleng an natna tawrh hian a tlakbuak a, Hetih chhung hian Calcutta ah an inenkawl a. Anmahni enkawltu doctor chuan Sap Upa chu ram luma awm a ngeih lo tiin England a haw leh turin a rawn a, mahse Sap Upa chuan, “Pathianin min tir a, ama thu thu a ni, Sap ramah zawng ka haw lo vang,” a ti tlat a. Tichuan hmun vawt Darjeelingah inenkawl turin an kal leh ta a ni.

TRIPURA AH RAWNG AN BAWL THEI LO An inenkawl fel ta maw tihin Brahmanbaria-ah an let leh a. Brahmanbaria atang hian Tripura-a rawngbawl tumin theihtawpin Tripura lal chu rawngbawl phalsak turin an dil leh a, mahse ani chuan a lo phalsak chuang lo va, chuvang chuan Mizorama rawngbawl chu tum nghetin Silchar lam atanga Mizoram luh chu an tum ta a ni.

ZORAM LUH TUMNA DANG Kum 1893 January thlaah Silchar an lut a, hetah hian an thianpa William Pettigrew-a pawh Manipur lut thei lovin a lo la awm a, Silcharah chuan inhmukhawmin kum khat dawn Silcharah hian rawng an bawl ho a ni. Pu Buanga leh Sap Upa hian Silchar an luh hlim hian Silchar khawdai, Mizoram lam atanga Silchar luhna kawngpui bulah inte an sa a. Heta tang hiam Mizoram atanga lokalte chu hmuin an intlawhpawh tan a, chung mite hnen atang chuan Pu Buanga leh Sap Upa te pawhin Mizo tawng an zir chhunzawm ta zel a, Mizo A, AW, B, pawh Silcharah hian an buaipui hle tawh a. Mizoram chanchin chu Silchar Deputy Commissioner leh Rahsi te hnen atangin an zir belh zel bawk a ni.

Hetih lai hian Pu Buanga te thiandun hian Silchar DC hnenah Mizoram luhphalna an dil thin a, mahse Mizoram bawrhsap phalna lo chuan Silchar DC chuan luh phalna a lo pe ngawt duh lo. Tichuan Silchar DC hriatpuinain Mizoram Bawrhsap A.W. Davies-a hnenah Jan 10, 1893 khan Mizoram luh phalna chu an dil ta a, mahse Mizoram Bawrhsap chuan ram a la ralmuan loh avangin kum khat chuang an nghah a tul mai theih tur thu a lo hrilh a, an hnual hle. Nasa taka tawngtaiin Pathian an kar a, Mizoram lut turin kawng hrang hrangin an inpuahchah bawk a, tichuan kum 1893 December thlaah harsatna hrang hrang karah Mizoram luh phalna chu an nei ta a. Tichuan hlim takin thiante nen inthlahna chawhlui an kilho a, an insiam a, tichuan December 26, 1893-ah Silchar atang chuan Mizoram panin sakawrin an bungrua te nen an lo chhuak ta a ni.

ZORAM AN LUT TA Silchar atang hian Mizoram lui ser ber Tlawng leh Tuiruang (Barak) infinna, Katakhal an pan a, chuta tang chuan Mosolman lawngin Mizoram panin Tlawng dung chu an rawn zawh chho ta a, Pu Buanga leh Sap Upa te chuan Mizoram chin thlen hlan an nghakhlel hle a, lawngpute chu Mizoram chin an thlen veleh hriattir turin an hrilh a. Anni pawh chu chiang bik hlei lo, hmun pakhat Mizoram chin nia an hriat an thlen chuan lawngpute chuan Pu Buanga te chu Mizoram chin a ni tiin an kawhhmuh a. Chulai hmun an thleng chuan Pu Buanga leh Sap Upa chu vaukamah chhukin tihtakzetin pathian hnenah thingthia tawngtaiin lawmthu an sawi a ni.

Lawngpute hi Mosolman an nih angin tlai ni tlak dawnah Mecca lam hawiin an tawngtai ziah a, an zin chhunga Chawlhni tla vawi hnih Dec 31, 1893 leh Jan 7, 1894 ah te chuan zin lovin an chawl zel thung a. tichuan ni 17 zet an thang hnuin January 11, 1894, kum 120 lai liamta, vawiin ni angah hian Pu Buanga leh Sap Upa te chuan Sairang an rawn thleng ta a ni.

Sairangah ni 4 an cham hnuin Jan 16, 1894-ah Pu Buanga leh Sap Upa te hian Aizawl an lut a, heta tang hian Mizoram ti eng turin Chanchin tha hril hna an thawk ta a ni.

TLIPNA Pu Buanga leh Sap Upa te hian Mizorama Krista Chanchin la hrelote hi an vei em em a, Mizoram lut tura an harsatna tawhte hi ngaihnawm tham khawp chhiar tur a awm. Hetih laia beidawng duh hauh lova Mizoram luh an tum tlat mai te, Tripura a rawngbawl an tum viau chunga a rem lo tlat mai te hian Pu Buanga leh Sap Upa te hi Pathianin Mizorama Chanchin tha mei chi eng tura a ruat an ni tih a tichiang hle a ni.

Thurawnte Zoram Vartian - Lalhruaitluanga Ralte Zofate chanchin ṭha rawn hlantute - P. L. Lianzuala

ATTACHMENTS
India Mission Association – Global Mission Summit leh Conference neih a ni

India Mission Association – Global Mission Summit leh Conference neih a ni

India Missions Association buatsaihin Zarkawt Prebyterian Kohhan Biak-inah-ah Global Mission Summit – 2024 chu June 11, 2024(Thawhlehni) zan atang khan neih tan a ni a.  Summit thupuiah II Korinth 10:16 thu “ in ram piah lamah pawh Chanchin Ṭha chu kan la hril zêl ang” tih thu hman a ni. He Summit ah hian Mizoram Baptist Kohhran aiawhin AGS-Mission - Rev. Dr. R. Lalthanmawia leh Mission Director Rev. Lalremsiama Ralte te an tel a, IMA Committee member ni lai Pastor te leh Kohhran Upa engemawzat an tel bawk a ni.  Global Mission Summit hi June 14, 2024 (Zirtawp) zah an tiak ang. …

Phawngpui West pastor Bial TKP ten Fakna Inkhawmpui an nei

Phawngpui West pastor Bial TKP ten Fakna Inkhawmpui an nei

Thalai Kristian pawl, Phawngpui West Pastor Bial chuan May 7-9, 2024 hmang khan BCM Biak In, Vartek-ah - Sam No. 103:1 thu – “Aw ka nunna Lalpa chu fak la” tih thupui hmangin Fakna Inkhawmpui an nei a. Speaker-ah Rev. Lallianmawia, Bialtu pastor an hmang. He Fakn Inkhawmpui hi Lawngtlai Area Baptist Choir te, zaithiam Nl. KC Vanlalzami (Aizawl), Tv. R. Laldinpuia (Lawngtlai), Tv. Francis HC Zorammuana (Lawngtlai) leh Nl. LP Zairimawii (Lawngtlai)  ten zaia rawngbawlin an hmanpui a ni. …

Pangzawl pastor bial-ah Upa leh rawngbawltu Seminar neih a ni.

Pangzawl pastor bial-ah Upa leh rawngbawltu Seminar neih a ni.

June ni 8, 2024, Inrinni khan Pangzawl pastor bial rorel thu pass tihlawhtlingin Kohhran upa leh Rawngbawltute pualin seminar neih a ni. Seminar ah hian Rev. PC. Lalmuankima, bialtu pastor chu resource person niin, hruaitu tha nih theih nana pawimawh hrang hrang, Kohhran chawm nana pawimawh hrang hrang, thuhril rawngbawl hna thawhna kawnga inbuatsaih dan tur te zirho niin, sawiho tura chhawp chhuah hrang hrang te sawi ho a ni bawk. …