- Rev. VL Nithanga
Paula chuan a chhâng a, " Eng in ti nge ni, in \ah in \ah a, ka lung in tihchhiat ? Lalpa Isua hming avâng chuan Jerusalem khuaa phuar chang ka huam lo va, thih pawh ka huam asin," a ti a (TT. 21:13).
He thu hi Tirhkoh Paula sawi a ni a. Kaisari khuaah an kal a, Philipa inah an thleng a. An châm rei ta ang reng a, chutih lai chuan Judai ram ata Zâwlnei Agaba a lo kal a. Paula kâwnghrên chu a la a, zia a khêl ta a. kâwnghrên chuan amah chu a ke te, a kutte a inphuar a. "Jerusalema Judate chuan hetiang hian he kâwnghrên neitu hi an la phuar ang a, Jentailte kutah an pe bawk ang," a ti a. Chu thu avâng chuan chuta awmte chuan Paula chu Jerusalem khuaa kal lo tûrin an ngên a.
Jerusalema a han kal chuan Judaten an lo man a, Jentailte kutah an pe mai ang tih an hlauhpui avângin \ap chung hialin kal lo tûrin an ngên a ni. Mahse, Paula tân chuan amah an hlauhthâwnpuina \awngkam leh \ap chunga an ngenna te chu a lung tichhetu mai a ni thung si a. "Jerusalemah chuan phuar chang ka huam lo va, thih pawh ka huam asin," a ti ta daih mai a. Tichuan, Pathian ram \ûlna avâng chuan Jerusalemah chuan an kal ta a nih kha.
Mizoram Zionist Team hming pua rawng ka bâwl vânglai khân, Kan rawngbâwlna kohhranten min chhawmdâwlna sum bâkah, \hahnem min ngaihpuitute thawh khâwm a\angin, China ramah Missionary 2 (pahnih) kan tîr a. Love in Action Ministry te nên thawk hovin, kan missionary pahnihte chu an field-ah an lo chhawr a.
Chutih lai chuan nula an la ni a, Nl Lalpârlâwmi leh Nl Lalnunngaii te an ni. Tûnah chuan an thawhna hmuna mi pasal an nei ve ve tawh a ni. Keini team-in kan châwm theih tawh loh hnuah Love In Action Ministry chuan an missionary atân an pawm zui zêl a, tûn thlengin China ramah chuan an la thawk ta reng a ni. Ka han sawi tum tak zâwk chu, Khawrihnîm khuaa Camping kan neih \umin, Nl Lalnunngaii chu kan tawng a. Missionary-a kal a duh êm êm mai a, kal ngawt ngaihna a lo hre si lo va. Team-in châwm tûr mi rintlâk tak kan zawng mêk tih a lo hria a. Inbeisei takin min rawn pan a, kan inkâwm ta a. "Communist ram, China rama kan Mizo hnahthlâk, Mizu te, Lusi te, Mazi te an awm a, kan hmân lai Mizo khawsak dân mâwl takin an la khawsa an ti a. Chumite chu han zawng chhuak a, chanchin \ha han hrilh tûr a nia kan duh chu. Nula pakhat chu an hmu tawh a, thih inhuam viau pawh a ngai dâwn a, han kal chu i inhuam tak tak ang maw?" ka ti a. Ani chuan, "Vawi khat chauh hi ka la thi dâwn tho tho va, Lal Isua tân martar-in ka thi lovang tih hi ka hlauh ber a ni," tiin min chhâng a. Nula la tuai lam deuh a ni a, a hmêl kan en chiang leh a, a fiamthu hauh lo va, a hmêlah chuan a ti takzet a ni tih a lang thei a. Min hneh hle mai a. Paula’n, "Jerusalemah chuan phuar chang ka huam lo va, thih pawh ka huam asin," a tih kha ka hre chhuak a. Missionary tûr atân chuan hetiang mi ngei hi alâwm kan zawn chu, China ramah chuan kan aiawhin i han kal dâwn nia, ka ti a. A duh zâwng tak hmu ta ang mai hian a hmêl chu a lo êng a, hlim takin an khuaa kan awm chhûng chuan kan inkhâwm ho va, Pathian fakin kan lâm ho \hîn a. A hnu deuhvah chuan China ramah chuan kan inthawn liam ta a nih kha.
Tirhkoh Paula chauh pawh a ni bik tawh lo, kan Mizo zîngah ngei pawh hian Lal Isua avânga tuar chauh pawh ni lo, thih pawh inhuam mi tam tak Lalpan a nei ta zêl a. Kan mission field lam han thlîr ila, phuar chang an huam a ni lo va, a \ûl phawt chuan thih thleng pawha Lal Isua ram zauhna tûra inhmang ral zêl tûrin kan missionay-ten ram ril lam an pan tak dêl dêl a. Hetianga martara nung ngamte hian ka nun hi min hneh \hîn a, min châwm a, lâwm avângin min ti \ap \hin a ni.
Hawh teh, keini pawh hi ram lailumah hian awm mah ila, Min chhandam tawhnaa inbêngbel hluau ringawt lo hian, engtin nge Lalpa tân hian tuar khawpin rawng kan lo bâwl ve ang a, engtin nge tûn ai hian kan \angkai lehzual ang tih hi kan \an lâkna lo ni ve zêl teh se. Isua Krista chhandamnaa lâwmte rêng rêng hian chu chhandamna chu mi dangte hriattîr ve an châk \hîn. Mi dang tih tûrah an ngai lo va, mi dang an kian hek lo.
Lal Isuan Gerasin ramhuai zâwl a tihdam khan Isua hnêna awm ve a, a dam tâk zia thu kha hmun tina sawi a châk hle a ni ang Isua hnêna awm ve a dîl a ni (Marka 5:18). Lal Isua chhânna chu “I inah, i \hiante hnênah haw la, Lalpa’n i tân thil a tihsak che hi a ropuizia leh a khawngaihzia che hi va hrilh rawh” a ti daih mai. Hei hi Evangelism \obul chu a ni. Mission Field hla tak kan thlîr lai hian kan bul maiah thihna ko tlângah mi tamtak an awm reng a ni. Zu, Drugs leh ruihtheihthil addict hote hi ICU-a awm reng ang an ni asin. Mi mal leh chhûngkua tibuai vek khawpa nungin thih pawh pawisa lo lêkin ni tin zan tin an tei huai huai asin. Sual avânga thih pawh an pawisak loh chuan Kraws Pathian thiltihtheihna hmangtute hian Chatuan Nunna avânga thih huama rawngbâwl hi kan tihtûr dik tak a ni ang.
Kohhran anga rawngbâwlna kan tih Tualchhûnga kan kalpui mêkah pawh hian 80% zet hi chu tihphung pânngai, thlarau lam pawh châwm nung zo êm êm lo a ni fo mai. Kan programme te \ha taka kan kalpui lai hian Pathian mit fûkna lai hi kan ngaihtuah chian chu a va pawimawh êm !
Guwahati-a Arunachal MLA pakhat thu sawi hian kan nihna a pho lang a, kan tihtûr pawh min kawhhmuh nghâl a ni. A thu sawi chu “Mizoram a\angin Arunachal-ah Missionary te an lo kal a, Pathian thu an rawn keng a, a lâwmawm êm êm laiin HIV/AIDS erawh hi chu khawngaih takin rawn keng tel suh u” tih hi a ni. Kan kristianna leh Mission rawngbâwlna kan kalpui dân te, Misionary kan tihte thleng hian ngaihtuah thar chu a va ngai tak êm ! I kiangah thimah mi an thi,
Thlânah thlamuanna nei lovin, tih hi a dik a, ni tinin a tam tual tual lehnghâl si. Hetiang a nih reng laia kan ngaihthaha kan mutthluksan a nih vaih chuan Pathian hmaah thiam kan chang chuang lovang a, a thiurna tizualtu mai kan ni ang.
I inah hâwng rawh, chuta \ang chuan bul \an \ha leh rawh. I kohhranah hâwng rawh, chutah chuan bul \an \ha leh rawh tih hi kan mamawh leh kan harh tharna tûr pawimawh tak a ni e. Paula inhuamna hi \awmpui ve ang u.
