ZIR LA, NUNPUI RAWH

- Rev. Pc Liandula
"Ama thu ring rawh, A thutiam nghet tak kha; Kristaah 'Amen' a ni e, Lei hi ral mah se, a ral ve dâwn lo ve, Chûng chu Bible-ah a chuang e."

Bible Verse: Isaia 55:10-13; I Kor 1:25-29 Khawvêl Sunday School Ni (November 5, 2017) kan lo thleng leh ta reng mai. Kumin hi Mizoram-a Sunday School a din atanga kum 121 (2017-1896)-na a lo ni ta reng mai. Mizoram chhim lam bîkah erawh chuan kum 114 (2017-1903) -na a ni thung. Tualchhûng Kohhran tinah thupui thlan sa, "Pathian thu - Nun kawng êntu," tih kan ngaithla theuh tûrah ngai ila. Baptist Today lamah erawh chuan Christian Eduction Department thupui (motto) "Zir la, nunpui rawh" tih hi i lo zirho teh ang u. Tripura Baptist Christian Union (TBCU)-a an hruaitu pakhatin Mizoram kristiante vânneihzia min hrilhah chuan, Sunday School tha tak kan nei hi niin a sawi. Pathian thu zirna hmun tha tak Sunday School min petu kan Pathian hnênah lâwm thu i sawi ang u.

Pathian thu tak tihdalna kawngah kan ram kristian nun hian ke a pên zêlin ka hria em ? Kan kristian nun ngei pawh a dal zêlin a lang em ? Pathian thu tak inzirtîr aia a bula thu tha ve, hrilhlâwkna leh thil dang inzirtîrte hi kan taihmâkna a ni tain a lang a, a that vena chen a awm thei. Mahse kristian nun tha leh mawi inzirtîr hlamchhiahin buaipui berah kan nei ang tih a hlauhawm a, Pathian thu hlutna hi kan hlamchhiah ang tih a hlauhawmin ka hria.

He thupui hian Pathian thu hlutzia te, a pawimawhna te, a thlumzia te, a thatzia leh khawvêl mamawh a nihziate a keng tel a. Pathian thu vêkin, "I thu hi ka ke atân te hian khâwnvâr a ni a, Ka kawng atânte hian êng a ni," (Sâm 119:105) a ti a. Engvângin nge kan zir ang a, kan nunpui ang ? Michael Faraday-a thu khawchâng hmang hian chhang mai teh ang. "Pathian thu chauh engmah belh leh paih ngai lovin, nun kawng hruaitu atân a tâwk," a ti. Keini zawng kan nun kawng zawh mêkah hian mamawh kan ngah lutuk em ? Pathian thu hi nun hruaitu atân tâwk zo kan ti ve em ? Mihring hi Pathian kaa thu tin chhuakin a nung zâwk a ni. Hêng thu atangte hian Pathian thu hi zir tham leh nunpui tlâk a ni tih a chiang nghâl rengin ka hria.

Ram rorêlna fawng vuantu tâna thufing leh rorêlna dik kawhhmuhtu tha ber a ni a. Sakhaw puithiamte kawng dik kawhhmuhtu, kohhran enkawlna hna thawktu tâna thurâwn tha ber petu a ni. John Calvin-a chuan, "Chunglam Lalin a kohhran chunga a rorêlna laltiang chu Bible hi a ni" a ti hial a ni. Retheihnain min chîm lai pawha thlamuantu tha ber a ni a, tuarna hnuaia awm mêkte tâna hlimna kawngka hawnsaktu a ni bawk. Hêngte hi a dikzia temtu chu Pathian mite an ni. Rev. Dr. Billy Graham chuan, "Bible hian lehkhabu dangin min pêk theih loh hlimna min pe a, harsatna min hnehsak a, hlauhna hmunah thlamuanna min pe a, thihna lui dai kai dân min hrilh a, ka dam chhûngin hriat vek ka tum a ni," a ti a. Dr. Robert A. Millikan (Scientist) chuan, "Bible hi zawhna siam hleih theih loh khawpa bulpui, khawvêl pumin a pawm rawn theih thudik nghîng ve thei lo chu a ni" a ti bawk.

Pathian thu chu zir tlâk a ni tih Isaia 55:10-13 thuah hian kan hmu thei. Ruah leh vûrin hna a thawh dân nên tehkhinin Pathian thu chuan thil a tihdanglam theih dân - lei a châwm a, thil a totîrin a chawrtîr a , eitu hnêna ei tur a pein buhchi thehtu hnênah buh chi a pêk dân te, rah tha chhuah tûra hna a thawh dânte kan hmu a. Hminghlîngnei aia fâr thing hmantlâk a totîr theih thu te, buar aia lenhmui thing, mi dangte tâna ei tur chhuah thei leh thing tlo a chhuahtîr theih thu kan hmu bawk. Paula hian, "Pathian âtna chu mihring aiin a fing zâwk a, a chak lohna pawh mihring aiin a chak zâwk a ni," (cf I Kor 1:25) a ti bawk. Chuvângin Pathian thu hi zir tham a awm tih a lang a, nunpui tlâk pawh a nihzia kan chhiar zêl khan kan hmu thei a ni.

Pathian thu chu khawi atangin nge kan zir ang ? Lal Isua ke bulah, kraws atangin zir tûr a ni a, heta tang hian a fiah ber a, a chiang ber a ni. Lal Isua lo lan hma khan kraws hi an lo hmang nasa hle tawh. Mahse thil tha a chhuak ngai lo. Mi hmuhsit leh endawng mai a ni a, Lal Isua a lo lan khan Juda sakhaw zirtîrna te, an khawtlâng nun leh zeiziate hre reng chungin zirtîrna tha chungchuang a rawn zirtîr a. Biang lehlama bêngtu hnênah lehlam pawh dawh thu te, I puan lâksaktu che chu i puan lâksak che pawh hnial suh tih te, I hmêlma chu hmangaih la, a thatna tûr ti ang che, tihte leh tiduhdahtute malsâwmsak a, tawngtaisak tûrtein a rawn zirtîr daih mai. Juda sakhaw zirtîrna atang chuan zirtîrna dik lo leh mak tak tih tûr a ni hial awm e.

Tichuan Lal Isuan kraws a rawn hmachhawn ve ta a, tihdanglam a lo ni ta. Mi hmuhsit leh engdawng chu ngaihhlutawm ber a lo ni ta a. Kristianna a lo zi chhuak ta a. Kristiante theology laipui pawh Kraws thu a ni ta a. Heta tang hian Pathian thu hi i zir ang u. Khawvêl buaipui leh khawvêl hriat fiah thiam rual lohva hlu a lo ni ta. Pathian thu tha tinrêng hi zir ila, nunpui leh si lo ila, engnge sâwt ang. Kraws-ah chuan engkim mai hi siam thar a lo ni ta a, mi sual thihna chu mi sual damna hmun a lo ni ta a, mi sual thiam loh channa hmun chu thiam-channa hmun a lo ni ta a, mi sual tihborala an awmna hmun chu chhandamna hmun a lo ni ta a, zirtîrna tha chungchuang zirtîrna chu hetah hian tihhlawhtlin a lo ni ta a ni. A tiduhdahtu tâna malsâwmsakna leh tawngtaisak theihna a lo chhuak ta a. Hmêlma hmangaih theihna pawh kraws-ah bawk hian a lo chhuak ta a ni. Pathian fapa hmangaihtuin hmangaihte tâna a tuarsakna a lo ni ta a.

Phuba lâkna leh ânchhia inlawhna hmun ni tawh lovin ngaihdamna hmun a lo ni tawh zâwk a ni. Chuvângin Pathian thu hi Lal Isua ke bulah, kraws atang hian i zir nawn leh ang u. AMEN.

Kohhranten kan hriat reng tûr chu *Mi bote Krista hnêna hruai (Piangthar tûra mite buatsaihna hmun) *Mihring dik tak ni tûra buatsaih (Kristian nun dân tha inzirtîrna hmun) *Kohhran mi dik tak ni tûra buatsaih (Kohhran tihnghehna tûra inzirtîrna hmun) *Pathian thu dik taka pawm leh hmantîr (Kohhran rangkachak khur)

 
ATTACHMENTS
Good Friday leh Easter Sunday programme hman mek a ni.

Good Friday leh Easter Sunday programme hman mek a ni.

Kristiante ni pawimawh ber te zing ami “Good Friday” chu nimin, march 29, 2024 khan hman a ni a.  Kumin Good Friday thupui-ah Johana 19:30 thu atangin “A kin ta’ tih chu thupuiah hman a ni. March 28 (Ningani) Good Friday Eve-ah Tualchhung Kohhran engemawzat ah Lalpa Zanriah (Sacrament) an kilho a. Bialtu pastor leh Bial nei lo Minister leh Headquarters-a hruaitute pawh Kohhran hrang hrangah in sem darhin Lalpa Zanriah Sacrament hi an buatsaih a ni. Headquarters a kan hruaitute pawhin hetiang hian Kohhran hrang hrangah Sacrament buatsaihin hun an hmang :- …

Kristian Hlabu ennawn Sub-Committee an thu khawm

Kristian Hlabu ennawn Sub-Committee an thu khawm

Tun kar Thawhlehni, March 26, 2024 khan Headquarters Office Committee Room No. 1 ah BCM atanga Kristian Hlabu ennawn Sub.Committee an thukhawm a. Upa C. Hrangdula, Committee Convener-in a kaihruai a, meeting-ah hian member 10 an kal a ni. …

BCM Shalom, Mission Vengthlang ten Junior ṬKP  Retreat an nei.

BCM Shalom, Mission Vengthlang ten Junior ṬKP  Retreat an nei.

Retreat hi Lawmsanga Camping Centre, Ailawng ramah march ni 25 & 26 khan neih a ni a, mipa 12, hmeichhia 19 leh hruaitu 7 an tel a ni. Speaker atan Rbt. Stephen Lalruatfela leh a rawngbawlpui (Krista Thawhpuitute Team) te hman an ni …