Camping Centre hawnna hi July 28, 2023 (Zirtawpni) chawhnu dar 2:30 khan neih a ni a. General Secretary-in Centre hawnna a neih hnu-ah Chapel-ah Inkhawmna neih zui a ni a. Rev. R. Lalnunzira, AGS-Service-in inkhawm kaihruaiin, Rev. KV Thanga, President-in Pathian hnena inkawltirna a nei a. Er. Victor LalrinAwma Sailo, Director, BCM Property Department-in Camping Centre buatsaih a nih dan leh hmalak dan tlangpui sawiin report a pe.
BCM Choir leh Pi Bethsy lalrinsangi ten Pathian fakna hla sain, Rev. Lalremsiama Ralte, Director, Mission-in Camping Centre Pathian hnena hlanna leh malsawm tawngtaiin hun a khar a ni. Camping Centre hawnna Inkhawm-ah hian Kohhran hruaitu te, Headquarters Office-a thawktute leh Lunglei khaw chhunga Tualchhung Kohhran hrang hrang aiawh leh Pastor Bial aiawh te an tel a ni.
Baptist Camping Centre hi tum khatah mi 100 chin luh theihna atana ruahman niin, Chapel feet 26 x 50 a zau, mi 180 vel len theihna te, Dinning Hall Ft 36x30 leh Choka feet 24 x 18 a zau te, Main Building Feet 70 x 35 (R&D Building hlui) te, Adminstrative Building feet 34x15 a zau te a awm a. Chapel hnung lamah Tawngtaina hmun fianrial nuam tak a awm bawk. Heng building hrang hrang sak thar leh a hmunhma buatsaih nan hian Hnatlang tha bakah cheng nuai 30 ruahman a ni.
Baptist Camping Centre hi Pastor Bial leh Tualchhung Kohhran te, Pawl ho leh rawngbawlna kawng hrang hranga hmang duhte tana hman theih a ni ang a. Hetianga hmang duhte chuan Administrative Officer, Hqrs. Office, hnenah ngaihvenin, General Secretary hnenah dil theih a ni ang.
