Archive & Library building thar hawnna hi April 20, 2023, (Ningani) khan neih a ni a, Upa MS Dawngliana, Archivist-in Inkhawm kaihruaiin,  Upa F. Lalromawia, BCM Airchive & Library Committee member-in Pathian hnena inkawltirna hunserh a hmang.

Hawnna inkhawm hruaitu in Archives & Library chanchin tlangpui a sawi bak ah Nl.Lalrammawii Thangluah, Assistant Archivist hnen atangin Archives & Library dinhmun report tlangpui leh  Er. Victor Lalrinawma Sailo, Property Director hnen atangin Archives & Library hmunhma thar buatsaih a nih dan ngaihthlak a ni bawk.  Hemi zawh hian Rev. R. Lalbiakliana, General Secretary-in thu a sawi a, thu a sawi zawhah Archive Room-ah Monument hawngin Pathian hnenah a hlanin tawngtaina a nei nghal a, Archive Room tlawh duh te tan hawn nghal a ni.

BCM Archive neih chungchang relna hmasa ber hi General Committee Meeting No 228-na, 7 March, 1988 niin record a ni a, heta tang hian hma lak chhoh ni in Headquarters Office building ah hmun pawimawh tak a chang chho ve ta zel a, Archives chauh ni lovin Library nen buatsaih kawp alo ni leh ta zel a. Tuna Archive & Library hmun atana ruat leh luah luah tak hi Archive din tan ni hmasa ber atanga kum 34-na chiah, 7 March 2022 (7 March, 1988) khan luah tan a ni ta a ni. Tunah hian thil hlui chi hrang hrang 138 leh lehkhabu hawhchhuah theih volume 4080 leh hawhchhuah theihloh, a hmuna chhiar theih 1750 vawnthata enkawl mek a ni.