“Hmangaihna In” Pathian hnena hlanna Inkhawm hi August 8, 2023 (Thawhlehni) tlai dar 3:00-ah neih a ni a. Pc Lalvohbiki, President – MBKHP-in Inkhawm kaihruaiin, Pi Lalnunzami Chawngthu, Project Manager, Grace Society-in report a pe a.  Rev. R. Lalbiakliana, General Secertary-in Pathian hnena hlanna leh Lawmthusawina a nei a. Nl. Lalhmingmawii Chongthu, MBKHP Secertary-in Lawmthusawiin, Rev. ZD Rodingliana, Director Worship Department-in malsawm tawngtaiin hun a khar a, tlaiah chawhlui kilho nghal a ni.  Hmangaihna In hlanna hunah hian Chhawmdawlna In-a awmte leh thawktute bakah MBKHP hruaitute, BCM Headquarters hruaituten an tel a ni.

‘Hmangaihna In’ hi kum 2020, March thla atanga sak tan a ni a,  July 2023-ah sak zawh a ni a.  Building hi chhawng 3 niin, a hnuai ber (basement)-ah Hall, TV room leh Table Tennis khelhna te a awm a, Kawng zawl (ground floor) leh chhawng khatna (first floor) ah Hostel khum  30 awmna leh Duty room pahnih bakah insukna room te a awm a, a chung berah Hostel Attendant Quarters  leh choka a awm bawk.  A sak nan hian cheng nuai 122, Sing 3, sang 5 leh 600 sen a ni. Hmangaihna in hawn a nih hnu hian Chhawmdawlna In ah mi 100 (mipa 70 leh Hmeichhia 30) an awm thei dawn ta a ni.