Vawiin, February 10, 2023 (Zirtawpni) chawhnu dar 12:30 khan Christian Hospital, Serkawn chuan kum za a tlin lawmna neih a ni a. Centenary lawmna inkhawm hi BCM Hall, Hqrs. Office, Serkawn-ah neih niin, Rev. R. Lalnunzira, AGS-in inkhawm a kaihruai a, Upa Dr. Lalramzauva, Director, Medical & Health Dept. in Hospital Report pe-in, BCM President Rev. Dr. R. Zolawma leh Mizoram Sorkar Health Minister Upa Dr. R. Lalthangliana ten thu an sawi a, Rev. Dr. R. Lalthanmawia, AGS – Mission-in Christian Hospital, Serkawn Kum 100 tlinna Souvenir a tlangzarh a, BCM Choir leh Hospital Zaipawl te an zai bawk.

BCM President Rev. Dr. Zolawma chuan, Lal Isua ngaihpawimawh em em, Tihdam rawngbalwnaah Kohhran te lungrual taka kan penho thei leh kan tanrualna avanga tun hun kan thleng thei hi lawmawma tih thu sawii, he rawngbawlna hian hma a sawn zel dawn a, Lal Isua lo kal thlengin he rawngbawlna hi kan thawk anga, hma lam kan pan zel dawn a ni a ti. Upa Dr. Lalthangliana, Health Minister chuan, Christian Hospital a din tirh atanga tun thlenga a tangkaina leh a rawngbawlna thlirin a lawmawm a tih thu leh Mizorama Damdawiin kum 100 tling pathumna a ni chu chhuanawm a tih a sawi a, Mizo hian hriselna lam kan ngaihpawimawh deuh deuh a, kan taksa tana tha lo te bansana, Pathian ngaihpawimawh em em mi dangte rawngbawlsaktu leh tanpui ngaite tana luang chhuak thei tura hriselna ngaipawimawh zel turin a fuih bawk. Health Minister hian Christian Hospital-a hman tur Oxygenerator pahnih a a hlan nghal a ni. Centenary lawmna Inkhawm neih zawh hian Hospital Centenary Building chu General Secretary Rev. R. Lalbiakliana’n a hawng a. Medical Superintendent Dr. HS Lalchungnunga’n kaihruaiin Er.Victor Lalrinawm, Director, Property dept.in Technical Report a pe bawk.

Christian Hospital Centenary Building hi cheng nuai 534 senna tura ruahman a ni a. Chhawng 3 (Floor pathum awmin,  a dung feet 100,  a vang Feet 32, a sir lehlamah feet 90 a dung leh avang feet 32 in sak a ni a. January 2021-ah lungphum phumin bul tan a ni a, a sak hna hi BCM Property Department-in thawkin tunah hian Floor pahnih chu luah theihin an peih a, a hnuai ber (basemanet) chu Parking leh thil dang-ah hman a ni ang a, kawng rual chhuat (ground floor) hi Radiology (Lithostipsy, ultrasound, Xray, CT Scan) te dahna atan ruahman niin, chhawng khatna(First Floor) chu Blood Bank, Blood Donaton room leh Counselling Room atan te buatsaih a ni. A chung ber hi a tul ang leh mamawh anga la sak zawm tura duan a ni bawk. Tuna thlen chinah hian Rs. 233,19,830/- (cheng nuai 233 leh sing 1, sang 9 leh 830) sen ral tawh a ni.

Christian Hospital, Serkawn hi kum 1923, February 10-ah khum 30 neiin Dispensary atangin Hospital-ah hlankai a ni a. Hetih hun lai hian Doctor puitling an la neih loh avangin BMS thawhna hmun Bangladesh atang te, Bengal atang te-in BMS Doctor ten an rawn vil thin a ni. Kum 1957-ah Dr. H.G. Stockley (Dr Zomuana) chu Christian Hospital-a Doctor puitling awm hmasa ber ni turin a rawn awm tan a ni. Tunah hian Christian Hospital, Serkawn-ah hian Khum 100 chung awmin, Doctor 18 leh thawktu dang 160 chung an awm mek a ni.