April 29-30, 2023 khan Lawngtlai East Pastor Bial Sunday School Committee buatsaihin Intemediate Meet leh Quiz Competition, BCM Biak In, Bazar Veng, Lawngtlai-ah neih a ni a. He Meet-ah hian Rev. Lalzarliana Khiangte, Bialtu Pastor, Lawngtlai East chu Speaker niin Rastriya Kishore Swasthya Karyarram (RKSK) thawktute chu Resource person-ah hman an ni.

Inrinni chawhma lamah RKSK lam aṭangin tleirawlte leh naupangte hriselna lama inenkawl dan kawng hrang hrang te, rilru leh taksa vawn thianghlimna lam te, taksa tana thil tha lo (Substance Abuse – Zu, Drugs, Zuk leh hmuam leh Hmawmsawm) laka fihlim a ṭulna te zirtirna neiin zirlaite'n an dawngsawng ṭha hle. Chawhnu lamah Quiz Competition neih a ni a, Inrinni zan leh Pathianni zing-ah Pathian biak inkhawm neiin Speaker-in thuchah a sawi bakah Zaipawl, Group zai leh Malzai te ngaihthlak a ni bawk.  

Pathianni chawhnu-ah Fellowship neih a ni a, hetah hian Resource Person te hnen aṭangin zirtirna ngaihthlak leh niin, Special Item, Group zai leh malzai te ngaihthlak a ni bawk. Pathianni zanah Pathian biak inkhawm awm lehin Speaker thuchah leh zaia rawngbawlnate ngaihthlak a ni a, Quiz result puan leh lawmman semna neih nghal a ni.

Lawngtlai East Bial-ah hian Tualchhung Kohhran panga – Bazar Veng, Immanuel, Lawngtlai vengpui, Nazareth leh Zion Kohhran te awmin, Intermediate zirlai hi bial pumah mi 159 an awm mek a, tun ṭumah hian zirlai 115 an kal thei a, puipate leh zirtirtute nen mi 150 zet an kal thei a ni.