‘Thuawihna leh Taihmakna’ tih thupui hmanga Kristian Naupang Pawl (KNP) te puala Lemchan tawi intihsiak buatsaih-ah Mizoram hmun hrang hranga KNP Unit 43 a tangin Lemchan Tawi thehluh a ni a, heng lemchan tawi te hi endiktu-a ruat mi 3 ten uluk taka an endik hnu in, Judge te leh Lemchan Tawi Sub-Committee ten August ni 1 khan uluk taka thlirho leh in, result peih fel a ni. Hemi ni vek hian Khawnvar YouTube Channel ah KNP Unit 43 atanga heng Lemchan Tawi hlimthla (Trailer) te chu dah nghal a ni bawk.
Lemchan Tawi Sub Committee thukhawm chuan result puan dan tur leh lawmman semna inkhawm neih dan tur hetiang hian ruahmanna a siam. August ni 11 (Zirtawpni) tlai dar 3 ah Khawnvar Channel, TV leh YouTube ah a ti tha thlanchhuah sawm (Top Ten) result puan a ni ang a, August ni 25 (Zirtawp) zan dar 7 ah BCM Hall, Serkawn ah a hmawrbawkna result puanna leh lawm man semna neih a ni ang. A hmawrbawkna hun ah hian naupangte rilrem thei ang berin red-carpet event buatsaih a nih bak ah, zai leh lam hmuhnawm tak tak thlir tur a awm bawk ang a, Lemchan Tawi intihsiaka lawm man pakhatna enho a ni bawk ang.
