Mount Carmel Mission School, Hostel Building Pathian Hnena Hlanna neih a ni.

Mount Carmel Mission School, Roing, Arunchal Far-East Field Hostel Building chu May ni 19 khan  Pu Sundar Langkam, Dibang Lohid Namsai Baptist Church Association (DLNBCA) Asst. Executive Secretary in hawngin, Executive Secretary, Pu Aprang Pertin a'n Pathian hnênah hlanna a nei.

Mount Carmel Mission School hi BCM in Arunachal Far East Field a kan thawhpui, Dibang Lohit Namsai Baptist Churches Association in Kum 2015 khan dinin, May 18, 2015 khan hawn a ni a. Kum eng emaw chen Missionary te puihna hnuaia an enkawl hnu in Kum 2021 khan BCM chu enkawl sak turin min ngen a. An ngenna chu Assembly 2022 chuan pawmin 2022-2023 Session aṭang khan BCM in thuneihna pumhlum neiin a enkawl chho ta a ni. Mt.Carmel Mission School-ah hian Nursery aṭanga Class V thleng a zir theih a, kumin hian Hosteller 43 leh   Day Scholar 27 awmin, zirlai 70 an nei mek a ni.

May 19-21 hmang khan Chanmmari Pastor Bial Lunglei leh BCM Gilgal, Theiriat-ah Mission Convention neih a ni.

#Chanmari Pastor Bial chuan “Pa-in mi tir angin ka tirh che u hi” Johan 20:21 thupui-a hmangin BCM Biak In, Zion, Ramthar, Lunglei-ah Mission Convention hi an nei a. Speaker-ah Rev. Dr. R. Lalthanmawia, AGS-Mission an hmang.

Inrinni zan, Pathianni zing leh Pathianni zanah te Pathian Biak Inkhawm neiin hun hman a ni a, Bial chhunga Kohhran hrang hrang Zaipawl ten hla remin, anni bakah hian BKHP Unit leh BMP Unit zaipawl te hla rem ngaihthlak thin a ni bawk. Pathinni Chawhnu-ah Inpawlhona neih a ni a, Pro.Pastor Laldinmawia Hnamte-in Fellowship a kaihruai a, Rev. Zonunvula Ralte hnen atangin Mission Report ngaihthlak a ni a, zawhna leh chhann hun te hmangin, BMP leh BKHP Zaipawl ten rawngbawlna an nei bawk.

#BCM Gilgal, Theiriat chuan Johana 20:21 thu  “Ka tirh che u hi” tih thupuiah hmangin Mission Convention hi an nei a, Speaker-ah Rev. Lalremsiama Ralte, Mission Director an hmang.

Zirtawp zan atangin Pathianni zan thleng hun hmangin Pathian Biak Inkhawm neih thin a ni a.

Inkhawm apiangin Speaker thuchah bakah Kohhran Zaipawl te, BMP, BKHP leh KNP Zaipawl ten hla an rem thin a, Pathianni chawhnu-ah Kohhran pum huapin Inpawlhona neih a ni a Mission rawngbalwna chungchang sawihona leh zawhna leh chhanna te neih a ni. Pathianni zan inkhawm banah Convention hi an tiak a ni. Kohhran mipuiin an hlutin Inkhawm leh Inpawlhonaah kal an tha thei hle.

Chakma Bible lehlin mek-ah 1 Chronicles leh Nehemia bu te Review Meeting neih a ni.

May 23-27 chhung hian Chakma Bible lehlin mek endiktu Committee, Read and Review Committee (RRC) meeting,   Chakma Mission Committee Room, Chawngte 'C' -ah neih a ni a, tun tumah hian 1 Chronicles leh Nehemia te an en nawn a, Bible letlingtute hi: Pu HC. Lalhmunliana, Pu Kiran Jyoti Chakma leh Pu Eliazar Vanlalrina te an ni.

Chakma Bible lehlin hi hun rei tak atangin ngawrh takin kalpui a ni a, kum 2012 khan Thuthlung Thar hi chhuah a ni tawh a. Thuthlung Hlui lehlin hna thawk zui nghalin, tun dinhmunah Thuthlung hlui bu 13 - Genesis, Exodus, Leviticus, Numbers, Joshua, Roreltute, Ruthi, 1 Samuela, 2 Samuela, 1 Lalte, Sam, Jona, Thufingte chu letling zo tawhin, Read and Review Committee pawh an paltlang tawh a, chhut theiha peih fel tawh a ni a, 2 Lalte, Deuteronomy leh Ezra te hi Translator ten zo tawhin a chhung thu endikna kalpui mek a ni bawk.

Chakma Bible lehlin mek hi BCM project pawimawh tak mai a ni a, Bibles International (BI) te nena thawhhona niin, India rama an branch Bibles International India Society (BIIS) te nen hma lak a ni.

Tripura Field-a Tailoring Centre, Garjee-a Puanthui zir tur mi 10 lak an ni

May 23, 2023 (Thawhlehni) khan Tripura Field, Gorjee Tailoring Centre-a Puan thui zir dil te interview neih a ni a. Diltu mi sawmpathum aṭangin mi sawm lak an ni. He Training na hmun hi Tripura-a kan ringthar te tih hmasawnna tur atana buatsaih a nih bak ah ringlo mi ten Pathian an lo hriat theihna tur atana buatsaih a nih ang in, training tura thlan zinga pahnih hi Kristian ni lo an ni a. June 1 atangin an zir tan dawn a ni.

Missionary panga Furlough Deputation hmangin an lo chhuak.

#Pu Siamkima Khiangte, Evangelist, Lalmati, Assam Field-a thawk te chhungkua chuan Rahsiveng Pastor Bial, Phawngpui West Bial leh Chawngte East Pastor Bialah te Progamme hmangin tunkar, May 24 khan an Furloug Programme duan sa chu an hmang zo.

#Pu K. Lalzuimawia, Evangelist, Arunachal East Field chuan Phawngpui South Bial, Vairengte Bial leh Hnahthial South Bialah te hun hmangin tunkar nilai zan khan programme duan sa chu an hmang zo ta bawk.

#Nl. Zohmingthangi Khiangte, E.T, St. James Higher Secondary School, Tripura Field chuan Lawngtlai South Bialah –ah programme a hman zawh hnu-in, May 20-28 hian Diltlang Bial-ah Programme a hmang leh mek a, June 1-4 –ah Thenhlum Bialah hun a hman chunzawm ang.

#Pu Pc Lalbiakzara, Arunachal West field-a thawk chuan May 24 atang khan New Serchhip Bialah hun hmang tanin, May 28 thleng hian Kohhran hrang hrangah hun a hmang ang a, June 7 – 11 chhungin Tuiphai Bial-ah Programme a hman chhunzawm leh ang.

#Nl. F. Lalsawmliani, Debitola Assam-a thawk chuan Muallianpui Pastor Bial-ah June 7-11 ah Furlough Programme hmang tanin, June 14-18  chhungin  Leite Pastor Bial-ah a hmang leh ang a, Serkawn Pastor Bial-ah June 21-25-ah te a hman chhunzawm leh dawn a ni.