Rev. ZD. Rodingliana Lecturer Jubilee Bible School chuan August 27, Nilaini zing dar 3:00 khan Christian Hospital Serkawnah a boral.
Rev. ZD. Rodingliana hi Pu Suakchhunga Zadeng leh Pi Liantluangi Sailo te inkarah January 30, 1962 khan Lunglei bul Ṭhuampui khuaah a pianga, pianpui unau mipa pali leh hmeichhia pali neiin, Rev. ZD. Rodingliana hi a upa lam aţanga chhiara pahnihna a ni.
January 12,1999 khan LH. Lallianmawii D/o LH. Vannawla nen kohhran dan puitlingin, BCM Biak in, Venglai, Lunglei-ah Rev. Dr. HS. Luaia’n a inneih tir a, fapa pathum an nei a ni.
Kum 1984-ah zirtirtu hna thawka Tuisenchhuaha a awm laiin, Pukpui kohhranah Beirual an neih laiin Pathianah piantharna a chang a. Hemi aţang hian Pathian rawngbawl duhna neiin Pathian thu zir a duh a. Hetih hun lai hi BCM in Pathian thuzir tur kan neih mang loh lai, kohhran te’n Pathian thuzir tur kan dil vanglai a ni a, kohhran te’n Pathian thu zirtur kan dil chhuahte zing a mi a ni kan ti thei awm e.
Pathian thu zirna :
Kum 1987-1990 B.th. ( Eastern Theological College ) Jorhat-ah
Kum 1996-1998 B.D (Bishop College) Kolkata a zir a ni.
Pastoral Ministry-a a luh hnuin Pro Pastor-in South Vanlaiphai Bial-ah a awm a, Ordain a nih hnuin Diltlang Pastor Bial, Tlabung Pastor Bial,Theiriat Pastor Bial, Rahsiveng Pastor Bial, Ṭawipui Pastor Bial, Lawngtlai North Pastor Bial, Chakma Mission incharge, Luangmual Pastpr Bial, Aizawl, Chanmari Pastor Bial Lunglei, Director, Christian Education, Department Fellowship & Worship Department leh Lecturer Jubilee Bible School-ah te a lo awm tawh ţhin a ni. Lecturer Jubilee Bible School-ah hian a hun tawp thlengin a thawk ta a ni.
A nat dan:
July 14, 2024 khan khawsik avangin Hospital-ah entir a. Damdawi te nen in lama a in enkawl chhunzawm hnuah hma a sawn vak loh avangin Hospital-ah admit a ni a. Investigation hrang hrang an tih hnuah Thin (Liver) Cancer a ni tih hmuh chhuah a ni . CMC Hospital Vellore panpui nghal a ni a. In enkawla thla eng emaw zat Vellore-a an awm hnuin Mizoramah lo haw chho leh in, a tlangval viau a. Hun eng emaw chen in lamah inenkawla hun an hman hnuah Hospital-ah dah luh leh niin, a zia deuh hnuah in lamah in enkawl chhunzawm lehin, August 2, 2025 khan Christian Hospital, Serkawn-ah dah luh leh a ni a. A damna dila kohhran hote, a thawpui ţhenrual ţha te’n bang lova kan ţawngţaipui laiin August 27, 2025 zinglam Dar 2;00 vel khan Christian Hospital, Serkawn-ah van kohhna chhangin min lo kalsan ta ni.
A chhenna In-ah August 27, 2025 chhun Dar 11:00-ah thlahna hun hman a ni a, Upa R. Vanngaia’n thlahna programme kai hruaiin, A nupui LH. Lallianmawii’n chhungkaw aiawhin thusawi na hun a hmang. A lawina BCM Biak In Pukpui West-ah vuina inkhawm hman chhunzawm a ni.
Rev. R. Lalnunzira Bialtu Pastor Zotlang Pastor Bial-in vuina inkhawm a kaihruaia, Rev. T. Lalsangvunga Director, Pastoral Department-in a rawngbawlna chanchin tlangpui sawi na a nei. BCM Pukpui West Kohhran aiawhin Upa Lalmawizuala’n a chanchin leh a mah uina thu a sawi zawhin, Pukpui West kohhran zaipawl te’n amah thlah nan fakna hla, amah thlah nan a, a mah Rev ZD Rodingliana’n a thlan ngei Kristian Hla Bu No. 424 “Isu ka hmangaih che ka ta i ni e” tih hla mawi tak leh lungkuai taka remin, Rev. Dr. B. Lalramhluna Principal, Jubilee Bible School-in Bible chhiarna a nei.
Tualchhung kohhran hruaitu, Bial hruaitute leh Pastor & Minister te’n kuang chunga pangpar dahna an neih zawhah Rev. Dr. H. Lalthlamuana General Secretary-in thlahna thuchah ropui tak a sawi. Rev. Vanlalmuankima AGS-Service-in ţawngtaisakna neiin, “ Pathian ang chhung thianghlimah chuan” tih hla sak a nih hnuin President Rev. Dr. C. Vanlaldika’n Malsawmna in vuina inkhawm hi a ţin a ni.
Nupui fanaute tana Pa nih tling tak, kohhran mimir te tan biaknuam em em, Pa zaidam leh thinnel, hlimthei tak, Pathian rawngbawl ning ngai lo chu, ui tak chungin Pukpui Thlanmualah thlahliam a ni ta.
