April 9, 2023 (Pathianni) khan BCM Vengpui kohhran, S.Vanlaiphai chuan Headquarters Mission Department hriatpuinain, Tualchhung Kohhranin Missionary atana an lak, Nl. MC. Lalrinsiami MC. Lalmuankima (L) fanu S. Vanlaiphai (Vengpui) tirhchhuahna Inkhawm an buatsaih a.

Missionary Tirhchhuah Inkhawm hi Upa F. Lalmama Chairman BCM Vengpui S. Vanlaiphai in a kaihruai a, Upa. FN. Lalawmpuia, Kohhran Secretary  in Missionary atana lak a nih dan sawiin, Nl. MC. Lalrinsiami hnen aṭangin testimony ngaihthlak a ni a, Rev. Dr. R. Lalthanmawia, AGS Mission-in a tir chhuak. Rev. Zadingliana Pachuau, Bialtu Pastor in tawngtaisakna neiin, AGS Mission hnen aṭangin thuchah ngaihthlak a ni.

Nl. MC. Lalrinsiami Tirhchhuah Inkhawmah hian S. Vanlaiphai Pastor Bial zaipawl, Tualchhung Kohhran Zaipawl, KNP zaipawl, Rbt. Nelson F. Lallianpuia leh Nl. Lalhlumawii (Bitei) ten zaia rawngbawlna an nei a. Vengpui Kohhran, S.Vanlaiphai Bial TKP leh Bial Mission Committee te bakah tualchhung Felowship te - TKP, BMP, BKHP leh KNP ten thilpek an hlan bawk.

Nl. MC. Lalrinsiami hi thiamna lamah Bachelor of Commerce niin, kum 2019 khan TBZ Missionary-in Madhya Pradesh (Kanpur) leh Jharkhan (Jamshedpur) ah te a lo thawk tawh a. Tunah hian BCM Vengpui Kohhran chawmin MP & MH Field ah Field Director kaihhruaina-in a thawk dawn a ni.