- Rev. B. Lalrinawma
Bible: I Korinth 2:6-16; Marka 4:35- 5:5, 18 - 20 cf Luka 8:22-39.
INTRODUCTION:March ni 8 hi Zosâp Missionary hmasate Sâp Upa leh Pu Buanga te Baptist Missionary Society, London tirha Rangmati atanga Lawnglênga Tlabung an rawn thlenna ni a ni a. Lawnglêng atanga khawmual an kaina lai pawh "Missionary Kai" tih a ni ta a ni. Khatih hun lai 1903-ah kha chuan Krista rilru, thlarau bote hmangaihna leh lainatna tel lo chuan mahni thahnemngaihna avânga ram chhengchhia, a mi chêngte pawh mi mâwl leh lu la thîn (head hunter) an tihte zînga Chanchin Tha hril tûra kawng thui leh chhengchhiaa kal chu thiltihtheih loh tluk a ni. Amaherawh chu Krista rilru tawmpuitute tân tihmâkmawh a ni si (I Kor. 9:16). Chu rilru chu pu-in kan tûn dinhmun hi kan thlen theih nân Zosâpte khan hrehawm pawh pawisa lovin he ramthim chhah tak hi an rawn pan ngat ngat a nih kha. Tirhkohte thiltih bung 18 kan chhiar chuan Paula'n Korinth kohhran hi a phun a nih thu kan hmu a, tin, I Kor.1&2-ah hian he kohhran hi a vei zia kan hmu bawk.
Korinth kohhran hian chhuan tûr zâwk chhuang lovin anmahni Chanchin Tha rawn hrilhtute an chhuang zâwk a, chu chuan an zîngah inthenna a thlen ta hial a ni. Hei hian Krista Kraws chauh hi kan chhuan a tûlzia a tilang chiang hle. Puala'n, "Kei erawh chuan kan Lalpa Isua Krista Kraws lo chu ka chhuan loh tûr zia mai chu" a tih ang hian chhuan tûr dik kan chhuan a tûl hle a ni. A ni lo zâwk kan chhuan hian buaina, harsatna a thleng thîn a ni.
Paula chuan chhuan loh tûr an chhuan avânga Korinth kohhrana harsatna chu tihreh tumin nasa takin a bei a; thildang zawng aiin Isua Krista khenbeh thu hril hi a pawimawhzia leh Pathian finna thûkzia hi thlarau atang chauhva hriat theih a nihzia sawi lan a tum niin a lang. Chutianga Pathian duhzâwng leh thil tum ber zu hriate chu Krista rilru pute an ni.
Krista rilru chu engnge ni ? 1. Boralte zawn chhuah leh chhandam hi a ni: Luka 19:10-ah chuan Lal Isuan khawvêla a lo kal chhan chiang takin a sawi a, "Boralte zawnga chhandam tûrin mihring fapa hi a lo kal a ni" a ti. Boral veina tak tak hi chu hmangaihna atanga chhuak a ni tih a chiang hle a ni.
Ramthim rawngbâwlnaa harsa êm êm chu bo nih inhre lo leh bova inngai hauh lote, min do lêt zâwktute hmangaih hi a ni. Chutiang mite hmangaih chu a va han harsa tak êm! Mahse Lal Isua chuan chûngho chu a hmangaih tlat si. Chu tak chu a ni Krista rilru chu ni. Krista rilru chuan boralte chhanchhuah hi tum ber a ni. Tirhkoh Paula chuan chu Krista rilru chu tâwmpui vein "Krista rilru kan pu" a ti ngam hial a ni. Keiniho hian "Krista rilru kan pu" kan ti ngam ve ang em? Chu rilru tawmpuina tak tak atang chuan thlaruabote hmangaihnate, thahnemngai taka rawngbâwlna hi a lo awm thîn. Ring tak takin thusawi thin mahila Krista rilru tawmpuina tak tak tel lo chuan mi thinlung a nghawr nghîng zo lo a ni. Krista rilru tawmpuitu Sâp Upa leh Pu Buanga lo thlen ni hian Krista rilru min tawmpui thar tir se a va lâwmawm dâwn êm!
2. Krista rilru chu mahni inhlanna hi a ni: Phil. 2:5-11 kan chhiar chuan Krista rilru chu mahni inhlanna a ni tih kan hmu. Boralte chhanchhuak tûrin mahni a inhlân, a inphatsan thak. Ropuina zawng zawng hlîp thlain nang leh kei, khawvêl zawng zawng chhandam nân he khawvêl ramthim hi a rawn luhchilh a ni. A lo kal chhan berten an khêngbet lehnghâl. Chutiang chu a chungah a thleng dâwn tih hre reng mahse Setana'n a phuar beh tlatte a hmangaihna leh khawngaihna chuan Angel leh Seraften "a thianghlim e, a thianghlim e" tia chhûn leh zân châwl lova an chawimawina pawh thlahlel thei lovin khawvêlah a lo kal a ni.
Lal Isuan rawng a bâwl lai khân chauhte pawh a chau ve thîn ang. Chau hle mahse râl lehlamah chhanchhuah tûr an awm tih a hriat avângin "râl lehlamah i kal ang u" a ti talh talh thîn. Thli leh tuifâwnin a nang; an lawng chu a pil tak ngial dâwn; mahse boralte chhanchhuak tûrin râl lehlam a pan talh talh tho mai.
Râl lehlamah chuan ramhuai man chu a lo awm ngei mai. Chu chu a ni chhanchhuah ngai chu ni. Hei hi a ni kan Lal Isuan chhanchhuah a duh chu ni. Ramhuai chu a hnawtchhuak ta ngei a. Thlarau bo chhanchhuah hi hlu a va ti tak êm! Rawng kan bâwlnaah harsatna, buaina, manganna (thlipui leh ruahpui sûrin, sawichhiatna tuifâwnten) min chîm mahse Krista rilru puin thlarau bote chhanchhuak tûrin hma lam panin i kal zêl ang u.
Lal Isuan Petera hnêna thuneihna (Vânram chahbi) a pêk kha kan hnênah pawh pêk a ni. He thiltihtheihna hi ringtuten kan nei tih kan theihnghilh chuan thil pawi tak a ni ang. Lalpan chu thiltihtheihna min pêk chu i hmang tangkai ang u. He thilthihtheihna hmang hian sual saltângte i chhuah zalên ang u. Damlote a tihdam thîn ang khân i tidam ang u ."Damlote tidam ula, mitthite kaitho ula, Phârte tithianghlim ula, ramhuaite hnawtchhuak ang che u; a thlâwnin in hmu a, a thlâwnin pechhuak ang che u" Lal Isuan a ti. (Mtt. 10:8).
Krista chhandama awmte hnêna Lal Isua thupêk chu "I chunga thil thleng hi mi dangte va hrilh ve rawh," tih hi a ni. Chhandamna kan chan a , hlim leh lâwmna kan chan hi mi dangte hrilh ve tûr kan ni; chu chu missionary hna chu a ni mai.
Setana'n a la phuar beh tlatte hian "min chhan ru, chhan tlâk kan la awm e" tiin min au a ni. Chûng an au thâwm chu nang leh kei hian kan beng kan chhut ngawn an dâwn em ni ang? Krista rilru tâwmpuiin chhanchhuah hna hi i thawk zêl ang u. Nang leh kei hi Lalpan chutiang ti tûrin min ko a ni. Krista rilru i tâwmpui thar ang u.
