#Rev. Dr. R. Lalthanmawia, AGS, Mission ho in Mission Convention neih a ni.
April 22-23, 2023 chhung khan BCM Bethlehem, Cherhlun ah Mission Convention neih a ni a, Speaker atan Rev. Dr. R. Lalthanmawia, Associate General Secretary, Mission hman a ni. He Mission Convention hi Mission rawngbawlna kawng a Kohhran te hmasawnna leh infuih tharna nana hun hman a ni a, Speaker hnen atangin Pathian thuchah ṭha tak tak ngaihthlak a nih bakah, Nl. KC. Lalthanzami, BCM Chaltlang in zai a rawngbawlna a nei thin a ni.
Speaker hian Pathianni chawhnu lamah BCM Ngharchhip leh BCM New Ngharchhip Kohhran te tlawh in Tualchhung Kohhran hruaitute nen inkawmhona hun an hmang bawk.
Baptist Masihi Mission leh BCM Thiltlang te rawngbawlna kaltlangin ringthar 10 neih belh.
Tunkar liam ta chhung khan Baptist Masihi Mission leh BCM Thiltlang te tangkawp chuan Kawngpui siam te zingah rawngbawlna neiin Crusade an buatsaih a. April 24, 2023 (Thawhtan) zan khan ringthar 5 in baptisma an chang. Hnahthial North Pastor Bial Mission Committee buatsaihin rawngbawlna hmunah hian zanriah kilho a ni. Hnahthial North Bial Mission Committee member țhenkhat bakah Thiltlang ațangin Tualchhung Mission leh Kohhran Committee member engemaw zatin an țawiawm a ni. April 26 zan khan Zobawk daia crusade neih mek hmangin ringthar 5-in Baptisma an chang bawk. Heng ringthar te hi Director, Masihi Mission in Baptisma a chantir a. Kumin chhunga Baptist Mashihi Mission rawngbawlna atang hian ringthar mi 129 an nei tawh a ni.
#Diltlang Kohhran in Zochachhuah Missionary Quarters a hman tur bungbel leh tangka fai cheng 15,000/- an pe.
April 24 khan Diltlang Kohhran chuan Zochachhuah (Indo Myanmar border) a Missionary Quarters tlawhin, Kohhrante leh Quarters atana hman tur mamawh hrang hrang - bungbel engemawzat leh mamawh leina tur tangka fai cheng 15,000/- an pe a, Missionary te leh Kohran te an lawm hle. Zochachhuah-ah hian kumin February 28 khan Missionary Quarters hi an luah tan a, Biak In an la neih loh avangin Missionary Quarters-ah hian an inkhawm rih a ni. Tunah hian kohhran member 30 lai an neih tak vangin, Kohhran te leh Missionary te mamawh tul zual ni-a an hriatte hi an zu hlan a ni.
BCM Lunglawn-in Chakma Baptist Kohhran Roluiah Camping an nei
April 24 zan atang khan Chakma Baptist Kohhran, Rolui-ah BCM Lunglawn Mission Committee hmalakna-in Camping buatsaih a ni a. Camping-ah hian Mipa – 23 leh Hmeichhia – 11, an vaiin 34 an lut a ni. Speaker-ah Rbt. P.C. Laldinthara, Deputy Speaker, Evangelistic Team Mizoram hmangin, Speaker bakah hian Lunglawn Kohhran atangin member 10 an kal a ni.
BCM Zion Lunglei-in Damparengpuiah Work Camp an nei.
BCM Zion Lunglei te chuan April 18-21, 2023 chhung khan Damparengpuiah Work Camp an nei a, Kohhran member 12 an thawk chhuak a, Work Camp-ah hian Damdawi zawrhna leh Damlo inentirna tur In an sak sak a ni. In sakna tur hi MṬKP ten Rs.90,000(sing kua) an thawh a, BCM Zion hian tha-a an puih bakah hian MTKP sum thawhin a daih bak sum leh pai a tul angin an thawh belh bawk. Damparengpui-ah hian Missionary - Nl. J.Lalropuii, Evangelist Nurse -in damdawi zawrhna hi a enkawl a ni.
