Medical & Health Committee Meeting dated 30th October, 2024-a neih chuan a hnuaia hming tarlan hi Dietician Assistant (Contract), Christian Hospital Serkawn-a thawk turin a la thar a. 1st November, 2024 (Friday) Dar 10:30 Am-ah Director, Medical & Health Department, Christian Hospital Serkawn hnenah Joining Report a pek hnuin a thawhna hmun zawm tura tih a ni.

October 25-27, 2024 chhung khan “Thalai Hmantlak” tih thupui hmangin Aizawl Area TKP Meet 2024 chu Baptist Centre, Falkland, Aizawlah neih a ni a. Speaker-ah  Upa R. Lalrochama, President, MTKP leh Rev. Dr. Joe Laldinpuia, Asst. Prof. AICS te hman an ni.

Mizoram Kohhran hrang hang te inpumkhatna atana Kohhran hrang hrang aiawh ten ruahmanna an siam angin Council of Churches in Mizoram chu October 27, 2024 (Pathianni) chawhma dar 10:30 khan Mizoram Presbyterian Kohhran Biak In, Missionveng-ah hawn a ni ta. Council of Churches in Mizoram Hawnna Inkhawm hi Rev. Dr. R. Lalbiakiana, General Secretary, BCM-in kaihruaiin, Pathian Chibai buk tur leh Pathian fak tura Kohhran mipui te sawmna neiin Pathian hnenah Inkhawm a hlan a, hemi zawh hian Rev. R. Vanlalnghaka, Moderator, MPC leh Chairman, Joint Committee-in Council of Churchches in Mizoram hawnna leh Pathian hnena hlanna a nei a, Pu Lalruatkima, Joint Committee Recoding Secretary,  CCM-in CCM hruaitu atana ruat te hmelhriattirna a neih hnu-ah Rev. Dr. H Remthanga'n hruaitute lakluhna (Installation) a nei a. Mizoram Chief Miniter - Upa Lalduhoma leh Rev. Ramengliana, North East India Christian Council (NEICC) Secretary ten chibaibukna sawiin, Rev. Dr. Lalhmangaiha, General Secretary, CCM-in thu a sawi bawk. BCM Choir leh LIKBK Assembly Choir ten fakna hla remin Rev. Lalhuapliana (IKK) in malsawm tawngtaiin inkhawm a khar ta a ni.

Mizoram Kohhran te inpumkhatna atana Kohhran hrang hrang aiawh ten ruahmanna an siam angin Council of Churches in Mizoram chu October 26&27, 2024 hmang hian CCM Rorel leh inkhawmpui hmasa ber chu Mission Veng Presbyterian Kohhran Biak In, Aizawl-ah neih a ni dawn ta. Inrini chhun dar 12:30 atangin Rorel Inkhawm neih a ni ang a, CCM Rorel-ah hian Kohhran pawl hrang hrang atangin awiawh (Palai) tel thei tur mi 552 zet an awm dawn a ni. Inrinni zanah Palai lawmna Inkhawm neih a ni ang a, Kohhran hrang hrang aiawhte hnen atangin report tawi nghaihthlak a ni bawk ang.

October, 19, 2024 (Inrinni) khan Mizoram Ṭhalai Kristian Pawl Executive Committee Meeting Vawi 549 (15 of 2022-2025) chu Sap Upa leh Pu Buanga Hall, BCM Hqtrs.-ah neih a ni. Meeting hi Upa R. Lalrochama, President MṬKP chuan kaihruaiin, MṬKP Secretary Rev. F.Zorinkhuma hnen aṭangin MṬKP hmalakna hrang hrang report ngaihthlak a ni a. Report kim chang hi rorel member te hnenah ziaka sem a ni.Tun tum meeting-ah hian MTKP Inkhawmpui, February 13-16,, 2025 a neih tur Programme ruahmanna te thlirin an pawm a ni.

Serving in Mission (SIM) Internation hruaitu mi pali te chu Ocober 18 (Zirtawpni) khan Mizoram rawn thlengin, Mizoram Baptist Kohhran hmunpui, Serkawnah an tlawh a,  SIM hruaitu lo kal te hi SIM International Director - Pu. Phil Bauman leh a nupui Pi Ms. Andrea Bauman te, Director of Relationship Development - Ms. Christabel Khiangte Corazza  leh Deputy Director, SIM North East India, Shillong -Rev. Thlohnei Fachhai te an ni. SIM mikhual te hi General Secretary Rev. Dr. R. Lalbiakliana hovin Headquarters hruaituten an lo dawngsawng a ni.

October 20, 2024 Pathianni kha 'North East India Christian Council Tawngtai Ni' (NEICC Day of Prayer) a atan hman a ni a. He ni hi North East India Christian Council hnuaia Kohhran hrang hrang inthlunzawm te chuan kum tinin urhsun takin an hmang thin a ni.

October 12, 2024 (Inrinni) chawhma dar 10:30 khan, BCM Biak In, Lalnutui, Lungrang Pastor Bial ami chu Rev. Vanlalmuankima, Director, Pastoral Ministry Department-in a hawng. Biak In hawnna hi Biak In kawtah neiin, Presiding Minister-in ribbon chep chat-a a hawn hnu-ah,  Biak In chhungah lutin Biak In thar Pathian hnena hlanna leh lawmthusawi inkhawm neih chhunzawm a ni. Rev. H. Vanlalvawna, Bialtu Pastor-in Biak In hawn Inkhawm a kaihruai a, Upa M. Ramenfela, (Secretary?) BCM Lalnutui-in Kohhran dinhmun leh Biak In sak dan tlangpui report a pe bawk.  Biak In hawngtu Rev. Vanlalmuankima’n thuchah a sawi a, Lungrang Pastor Bial Zaipawl ten fakna hla an rem bawk.

October 14, 2024 cham-in Canadian Baptist Ministries (CBM) hotu, Senior Program Coordinator - Pu CP Raju chuan Mizoram Baptist Kohhran, R&D rawngbawlna a rawn tlawh a, R&D Coordinator Rbt Lalrinawma, Asst.Coordinator - Nl. T. Lalfawnveli leh Field Facilitator – Nl. Laldinthari ten lo dawngsawngin, CBM leh BCM Relief & Development Department thawhhona-a Youth skill Develooment Project hnuaia Training centre hrang hrang te an tlawhpui a ni. Project te tlawhpui a nih bakah R&D hotute nen Inkawmhona neih zui a ni a, Project kalpui zel dan tur leh Sustainability Project 2025-2027 atana an duan bawhzui dan tur te sawihona neih a ni.  R&D mikhual pawimawh hi October 16 (Nilaini) khan Lunglei chhuahsan in a hawng leh ta a  ni.

Mizoram  Baptist Mipa Pawl (MBMP) Inkhawmpui 2026 atana Logo tur chu mi hrang hrang hnenah siam tirin Executive Committee chuan an duh an thlang fel ta a, MBMP Inkhawmpui chungchang Official leh Programme hrang hrangah te hman theihin an pho chhuak ta.

Mizoram Baptist Kohhran Pastor Bial hrang hrangah Bial Rorel neiin, Zirtawp zan atang khan Inkhawmpui programme hman tan a ni a, Inrinni zan, Pathinni nileng leh Pathianni zanah te Kohhran pum huap programme siamin Pathianni zan-ah Inkhawmpui hi an tiak dawn a ni. Pastor Bial Rorel hi Mizoram Baptist Kohhran Pastor Bial hrang hrang 92-ah neih a ni a, General Secretary, Rev. Dr. R. Lalbiakliana chuan Pastor Bial hrang hrang inkhawmpui nei mek te hlawk tak leh hlim taka Inkhawmpui an hman theih nan duhsakna leh chibaibukna a hlan a ni.

October 8, 2024 khan Board of Theological Education of the Senate of Serampore College (BTESCC) buatsaihin Church Leaders Meet chu Regency Hotel, Zarkawt, Aizawlah neih a ni a, Kohhran hrang hrang panga atangin aiawh 45 an kalkhawm a, Mizoram Baptist Kohhran atangin General Secretary, Rev. Dr. R. Lalbiakliana hovin mi 14 lai an tel a ni. Senate of Serampore College atangin Rev. Dr. Limatula Longkumer, Registrar, Dr. Aswathy John Dean of SATHRI/ Research Dept. leh Rev. Dr. Rodinmawia Ralte, Dean of SCEPTRE & Secretary BTESSC te an rawn kal a ni.

October ni 7, 2024, Thawhtanni chawhnu dar thum khan AICS Faculty quarters thar hawnnna leh AICS kum 25-na hriatrengna atana Jubillee Multipurpose Hall lungphum phumna neih a ni a. Quarters hawnna inkhawm hi Principal Rev. D.C.Vanlaldika'n kaihruaiin, quarters sak dan tlangpui report a pe. Report in a tarlan danin quarters hi a dung feet 60, a vang feet 35 a ni a, a sak nan hian cheng nuai 47 dawn sen a ni. Rev. Dr. R. Lalbiakliana, General Secretary in quarters hi Pathian hnena hlanin tawngtaina hun a hmang a, Luangmual bialtu Pastor Rev. T. Lalawia'n inkhawm malsawmna in a khar a.

RC Vanlalhruaii D/o Lalhmingthangi, Dinthar, Aizawl chu Council of Churches in Mizoram (CCM) Office, Mission Veng, Aizawl-a Office Assistant cum Accountant hna thawk turin thla ruk (six months) chhung atan lak a ni.

October 1-3 hmang khan India Baptist Women’s Union (IBWU) General Assembly vawi 15-na Chennai, Tamilnadu-ah neih a ni a. Inkhawmpui thupui atan I Thessolonica 5:11 tlawh chhanin “I in dawmkang tawn zel ang u” (Build each other up) tih an hmang a ni. He Conference hmang hian MBKHP atangin hruaitute leh member an kal a, Kumin Inkhawmpui-ah hian Kum 2024- 2029 chhung atan India Baptist Women's Union (IBWU) President atan Rbt.Dr. Zoramthangi (MBKHP) chu ruat a ni.