Feb 24 leh 25, 2024 hmang khan Christian Education Department buatsaihin Cherhlun Pastor Bial, Vathuampui Pastor Bial leh CBC-Marpara-ah te Sunday School Training leh hetiang hian neih a ni:

February 24, 2024 khan Lawngtlai Area ṬKP Co-ordination Committee, Blood Donation Calendar siam zul zui in, ṬKP Chandmary Unit, Lawngtlai te chuan an unit Golden Jubilee pualin thisen pek runpui an nei a. Thisen Unit 14 (Mipa 7 leh Hmeichhia 7) an pe a ni.

February 26-29 chhung khan Baptist Church of Mizoram te, Chin Baptist Association of North America – USA te, Institute of Chin Affairs te, Seattle Chin Pawlpi, USA te leh BCM Bethani, Aizawl te thawhhona-in Zokhawthar-a raltlan te leh Kohhran te tan Medical Free Clinic thawh hnihna neih a ni a.

February 24 leh 25 hmang khan BMP S.Vanlaiphai Pastor Bial chuan “Rorelna Dik” ( Amosa 5:24) tih thupui-a hmangin, BCM Biak In, Ebenezer, Darzo-ah Bial BMP Inkhawmpui vawi 2-na an nei a, Pu Lalnunsanga Pachuau, MBMP Treasurer chu Speaker-ah an hmang a, zaithiam pahnih Nl C. Vanlaldini leh Pu Lalvulmawia Rahsiveng ten zaia rawngbawlna nei in an tawiawm.

February 23-25 hmang khan Jampui Sakhan Baptist Association (JSBA) Inkhawmpui vawi 106-na Behliangchhip Tripura-ah neih a ni a. He inkhawmpui hmanpui hian General Secretary - Rev. R. Lalbiakliana, Upa R. Lalbiakmuana leh BCM Choir te an kal a. General Secretary hian Pathianni zing-ah ‘I ram lo thleng rawh se, Kohhran-ah’ tih leh Pathianni zanah ‘I ram lo thleng rawh se, Khawtlang leh nun honaah’ tih thupui hmangin thuchah a sawi a, inkhawm apiangin BCM Choir ten zaia rawngbawlna an nei thin a ni. Inrinni zanah TBCU aiawh-a palai, BCM pastor Rev. B. Rothangpuia, Tripura Field Director a awm mek in ‘I ram lo thleng rawh se – Mimal nunah’ tih thupui hmangin thuchah a sawi bawk.

Mizoram Baptist Mipa Pawl (MBMP) hnuaia Environment Sub-Committee buatsaihin February 25, 2024 (Pathianni) chawhnu khan BCM Hall Serkawnah Lunglei khawpui huamchhunga BMP-te pualin Environment Awareness Campaign leh Environment humhalhna kawnga Essay inziahsiak result puan leh lawmman semna neih a ni a, bial leh unit aiawh BMP Member 200 zet an kalkhawm a ni.

February 22, 2024 (Ningani) Dar 10:00AM khan Mizoram Ṭhalai Kristian Pawl (MṬKP) rorèl vawi 70-na, BCM Biak In, Gilgal, Theiriat-ah neih a ni a, rorêl palâi 573 kalin, palai riak lùt hi mi 189 an awm.  Rorêl hi President Upa R. Lalrochama’n kaihruaiin, kum kal tàa ṬKP member ropuina rama kalte mi 173 (Mipa 150 leh hmeichhia 23)  sûnna hun hman a ni a, Rev. ZD Rodingliana, Director, Fellowship Department-in an kalsan chhûngkua leh rawngbâwlpuite tâna ṭawngṭàisakna hun a hmang.

February 10-18 chhung khan Mizo Christian Fellowship of Malaysia te zing ah rawngbawlna hi neih a ni a, an hun hmanna hi Kualalampur Baptist Church ni in, Chinese Baptist ho biak in a ni. Member hi 250 atanga 300 vel ni in, member lut chhuak hi an awm ve deuh reng a ni. Malaysia mizo baptist te zinga rawngbawla hun hman a nih chhung hian chhun lamah Bible Study vawi hnih zel neih thin a ni a, hetah hian mi 20 atanga 30 regular takin an tel thin a. Zan lamah Pathian biak inkhawm hun hman thin a ni a, hetah hian mi 80 atanga 100 an kalkhawm thin bawk. Bible Study leh Pathian biak inkhawm bak ah hian leadership training leh mission rawngbawlna kawnga hmalak dan tur inrawn hona hun te neih a ni bawk.

February ni 20, thawhlehni khan kikawn kohhran te chu Baptist Counselling Centre, Ramzotlang, Serkawn ah hnatlang in an thawk chhuak a. Kohhran member 38 thawk chhuak in, khum 32 lai an siam a ni.

February 17 leh 20 khan Maudarh khaw bul-a Mizorama zo sap missionary hmasa ber Pu Buanga (Rev. J.H. Lorrain) tawngtaina hmun hriatrengna MTKP in an siam chu a thuziak leh a hmun hma chei that hnatlang an thawk a. Hnatlang-ah hian MTKP hruaitute, Leite Unit leh Leite Bial Pastor Bial TKP hruaitute an thawk chhuak a ni.

February 19, 2024 (Thawhtanni) khan Relief & Development Department-a thawktute - Director, Rev. L. Vanlalsanga leh Nl. T. Lalfawnveli, Astt.Coordinator te chuan Thaizawl Relief Camp, Lunglei District-a raltlante tlawhin tanpuina an pe a. Tanpuina hi school sakna tur cheng sing 4 an pe a ni. Thaizawl-ah hian Raltlan chhungkaw 183 awmin mi 860 vel an la khawsa mek a ni..

February 20, 2024 khan, BCM Chanmari, Aizawl chuan an Kohhran din champhaphak vawi 25-na (Silver Jubilee) denchhen leh a lawmna pakhat atan Medical Free Clinic an buatsaih a. He free clinic hi Chanmari Local Council huam chhung mipui te leh an kohhran memberte tana buatsaih ani a, Chanmari veng thenawm atang pawhin chhimtu engemawzat an awm. Damlo inentir zawng zawng hi mi 350 chuang an ni.

February 15 atanga ni 18, 2024 chhunga Mizoram Baptist Kohran Hmeichhe Pawl (MBKHP) Inkhawmpui vawi 51-na Lungsena neih chu zawh a ni a, palai leh mikhual in ziak lut hi 4500 chuang an ni a, rorel palai hi 627 an ni.

Mizoram Baptist Kohhran hnuaia Nurse hna thawk hmasak berte zing ami leh Pension thlenga lo thawk tawh, Pi K. Lianchhingi, Lawngtlai chuan February 14, 2024 (Chhun dar 12:30) khan kum 94 mi niin chatuan ram min pan san ta. Hemi ni vek hian an chenna Salem, Lawngtlai-III lamah ah phurh phei a ni a, zanah tlaivarpuiin, a tuk, February 15, 2024 (Ningani) chhun dar 11:00 khan Rev. Lalbuakhlua Chawngthu-in vuiin, Salem thlanmualah ropui taka thlah liam a ni.

February 15 (Ningani zan) atang hian Mizoram Baptist Kohran Hmeichhe Pawl (MBKHP) Inkhawmpui vawi 51-na leh Rorel vawi 74-na chu LGSC Khelmual, Lungsen ah tan a ni dawn ta. Inkhawmpui thupui-ah  “Tho la, i Pathian ko rawh" (Jona 1:6) tih hmangin, Speaker-ah Rev. K. Lalnunsanga, Bialtu Pastor, Aizawl Central Pastor Bial a ni ang.