Asia-Pacific Baptist Federation hnuaia Chhawmdawlna hna thawktu APB-Aid Director Pu Roshan Mendis chuan vawiin June 27, 2023 (Thawhlehni) khan BCM Headquarters Office, Serkawn tlawhin BCM hruaitute leh R&D hotuten an lo dawngsawng a. Zing lamah Thaizawl leh Bualte vela Raltlante awmna, Relief Camp tlawhin Thaizawl atanga lo let lehin Headquarters Office a Department hotute leh Fellowship hruaitute nen inkawmhona, BCM Hall-ah an nei.

Vawiin June 27, 2023 (Thawhlehni) zing dar 10:00 khan 'Mizoram Baptist Kohhran, Inkhawm Kaihhruaina'  (Worship Manual) chu AGS Service Rev. R. Lalnunzira’n BCM Hall Headquarters Office Serkawn-ah a tlangzarh a, tlangzarhna a neih zawh-ah Tawngtaiin Pathian hnenah a hlan. Inkhawm Kaihhruaina (Worship Manual) hi phek 118-a chhah niin, bu khat cheng 100/- man a ni a, Baptist Bookroom hrang hrang-ah lei theih turin chhawp chhuah a ni ang.

Vawiin, June 26, 2023 (Thawhtanni) zing dar 9:30 khan Mizorama zosap Missionary lo chhuak te zinga Mizoram chhuahsan hnuhnung ber, Pi Zomawii (Miss JT Smith) chu Scotland, Dundee khua a kum upa te enkawlna hmunah kum 85 mi ni in a boral. Chanchin kan ziak lai hian a vui hun tur leh vui dan tur ruahman fel a la ni lo.

June 24 (Inrinni) khan Headquarters Office, Serkawn-ah Worship Department buatsaihin Worship Trainers’ Meet neih a ni a, Inrinni nilengin Seminar leh Training hun an hmang a. He hunah hian Worship Department in Trainer a ruat atangin mi 14 leh Officce lama thawktu leh chanvo neite nen 21 an tel thei a ni.

Mizoram Baptist Kohhran (BCM) leh Zomi Baptist Churches of North America (ZBCA) te chuan June 20, 2023 (Thawhlehni) khan thawhhona thuthlung (Memorundum of Understaning) chu kum 5 (2023-2027) chhung atan pawtseiin an ziak fel leh ta a. He MoU ziakna hi Nashville, Tennessee, USA-ah neih a ni a, BCM aiawhin President Rev. KV Thanga leh General Secretary Rev. R. Lalbiakliana ten hming an ziak a, ZBCA aiawhin an President leh General Secretary ten hming an ziak bawk.

Headquarters Office, Serkawn-a thawktute chuan June 19, 2023 – Thawhtanni khan BCM ram chhung, Serkawn-ah thing phun hnatlang an thawk a, thing chi hrang hrang 65 an phun. Headquarters Office-a thawk zin  leh  damlohna avanga chawlh la te tih loh chu an thawk chhuak tha hle a, AGS pahnih Rev. Dr. R. Lalthanmawia leh Rev R. Lalnunzira ten an ho a.

May 27 atang khan Lunglei khawpui chhunga Kohhran ten BCM Camping Cantre – Ramzotlang, Serkawn-a buatsaih mek-ah hnatlang an thawh chhunzawm zel a. Kohhran te an phurin hnatlang an thawk tha thei hle. Tunah hian Building hlui thiat zovin mi 100 vel len theihna tur inkhawmna (chapel) te, Dining Hall leh Choka te sak tan mek a ni a, Campers te mutna tur khum engemawzat siam mek a ni bawk.

June 18 Pathiani hmang khan MBKHP  Chhawmdawlna In pualin Chanmari pastor Bial, Lunglei-ah Campaign an nei a. MBKHP Hruaitute Rbt.H.Lalkimi, Vice President, Pi R.Lalnunziri, Exe.Comtt.Member leh Grace Society Board member te - Pi C.Lalhmingmawii leh Pi Lalnuntluangi te an kal.

Kum 2023 MTKP Rorel-in Plan-a a dah leh MTKP-in kumin chhunga inzirtir uar tura a ruahman - Zu leh ruihhlo that lo zia te, Intodelh inzirtirna te, Tuihna humhalh leh TKP te mawhphurhna chungchang-ah te, Rilru Hrisel neihna tura inzirtirna te chu kawng hrang hranginneih chhoh mek a ni a, hemi atan hian Bial, Area leh MTKP huaihawtin Awareness Campaign leh Seminar te neih thin a ni. Tunkar leh kar liam ta chhung khan hemi kawnga hmalakna hi hetiang hian neih a ni.

TKP Hauruang Pastor Bial buatsaihin, June 17 (Inrini) khan BCM Biak In, Immanuel, Hauruangah Zu leh Ruihhlo that loh zia inzirtirna (Awareness Campaign) an nei a. Rev. Lalremsiama Fanai, Manager, Baptist Counseling Centre chu zirtirna petu ah hmangin, Rev. L. Vanlalsanga, Director, Social Concern Department pawhin he hun hi a hmanpui bawk.

June 16, 2023(Zirtawpni) khan Mizoram Baptist Kohhran Hmeichhe Pawl (MBKHP) Grace Society leh MSACS te chuan MSACS Office Ramhlun ‘N’ Aizawl-ah  MBKHP - Grace Society Drop - In Centre kaltlanga HIV/AIDS darh zau zel tur venna kawnga thawhdunna thuthlung kal mek chu kum 2023 - 24 chhung atana pawt sei in, an ziak thar. Grace Society Chariman, Pi H. Lalkimi, Vice President, MBKHP leh Pi Lalnunzami Chawngthu, Secretary, Grace Society te kalin Board aiawhin hming an ziak a ni.

Vawiin June 21 (Nilaini) 2023 chawhma dar 10:00 khan 'BMP Aw' Tlangzarhna inkhawm BCM Hall, Headquaretyrs Office Serkawn-ah neih a ni a. Rev. H. Lalfakzuala, Secretary, MBMP-in kaihruaiin, MBMP Inkhawmpui Rorel 2023-in MBMP Chanchinbu buatsaih ni se ti a a rel bawhzuina kal zela Chanchinbu buatsaih tura hmalakna hrang hrang te tarlang in, Editorial Board te hmelhriattirna te a neih hnu-ah Rev. Dr. R. Lalthanmawia AGS-Mission in Mizoram BMP chanchinbu ‘BMP Aw’ hi tlangzarh.

Tunkar Pathianni June 18, 2023 hi Mizoram Baptist Kohhran Ni pawimawh “Relief Sunday” a ni a. He Ni hi Mizoram Baptist, Tualchhung Kohhran tinah hman a ni ang.  Kumin Relief Sunday thupui chu “nangmahni’n ei tur pe rawh u’ (Luka 9:13) tih a ni ang. Relief Sunday-ah hian Pathianni zing inkhawmah Headquarters leh Tualchung Kohhran Relief rawngbawlna chanchin report leh thupui thlan sa hmangin thuchah ngaihthlak a ni ang.

Higher and Technical Institute, Mizoram (HATIM) chuan June 13, 2023 (Thawhlehni) khan kum 2020-2023 Batch zirlaite chawimawina leh thlahna hun, Valedictory Ceremony vawi 14-na a hmang a, Rev. R. Lalnunzira, AGS (Service), BCM chu khuallian a ni. Zirlai nu leh pa leh sawmbik te nen mi 290 chuang he programme-ah hian an tel a ni.

June 10, 2023 (Inrinni) khan Mizoram baptist Kohhran, Chhipphir North Biak In sak thar chu Rev. R. Lalbiakliana, General Secretary-in a hawng. Biak In thar hawnna Inkhawm hi Rev. N. Vanlalzuia, Bialtu Pastor, Chhipphir Pastor Bialin a kaihruai a, General Secretary-in Kohhran thar leh Biak In thar a hawn hnu-ah  Tualchhung Kohhran Building Secretary-in Biak In thar sak dan report tlangpui a pe. BCM Choir, BCM Chhiphhir leh Chhipphir North Kohhran Zaipawl bakah Nl. Lalchhanchhuahi ten Pathian fakana hla an sa bawk.