April 11,2024 (Ningani) chawhma dar 11:00 khan Synod Office, Aizawl-ah Kristian Hlabu ennawn Committee Meeting neih a ni a. Kohhran pahnih- Presbyterian Church, Mizoram Synod leh Mizoram Baptist Kohhran atanga hlabu ennawn sub-committee ve ve ten ruahmanna an siam leh an lo thlir lawk atanga rawtna hrang hrang te thlirin, hla thar engemawzat sengluh tura pawmin, siamthat ngai leh ennawn ngai ni-a an hriat te pawh lo zir chiang a, ennawn chhoh remtih a ni a, hma lak zel dan tur ruahmanna te an siam a ni.

Director, Medical & Health Department report in a tarlan danin – March 2024 chhungin Christian Hospital Serkawn-ah damlo 2124 in entirin, an zinga 301 admit an ni a, nau piang 49  an awm laiin mitthi 10 an nei thung.  Report kimchang hetiang hi a ni:-

April 11, 2024, ningani zan khan Khawvela Baptist Kohhran hruaitu liante; Rev. Dr. Elijah Brown, General Secretary, Baptist World alliance (BWA),   Rev. Dr. Vee Tetseo, General Secretary, Asia Pacific Baptist Federation (APBF) leh  Rev. Samaresh Nayak, General Secretary, National Council of Baptist Churches in India (NCBCI) te chuan Shillong an tlawh a.

April 5-7, 2024 chhung khan Cherhlun Pastor Bial leh BCM Chanmari, Lunglie-ah te Mission Convention leh Mission Weekend hman a ni

April 6 & 7 hmang khan Damdep Pastor Bialah Sunday School Training, BCM Biak In, Damdep-II ah neih a ni a, h Upa K. Lalnuntluanga leh Upa Laldingliana Lianhna, Sunday School Trainer ten training hi an neihpui a. Inrinni nilengin Sunday School zirtirtute leh Sunday School puipate pualin hun hmang in, mi 60 an kalkhawm a.  Inrinni zan, pathianni zing leh pathianni zanah te Sunday School Campaign neih nghal a ni a,bial chhung Kohhran hrang hrangah hun hmangin trainer te hian thuchah an sawi a ni.

April 6 leh ni 7 hmang khan Lunglei Town Area huam chhunga Bial TKP te pualin TKP Meet, BCM Biak In venglaiah neih a ni a.Thupuiah ‘Kohhran’ tih hman a ni. Inrinni zanah Rbt. F. Lalremruatpuia, Vice President MTKP-in thuchah sawiin, Pathianni zing inkhawmah Rev. F. Zorinkhuma, SecretaryMTKP in thuchah a sawi a, Pathianni chawhnu lamah Fellowship neiin Pathianni zan Inkhawm-ah  Upa R. Lalrochama, MTKP President-in thuchah a sawi.

Jubilee Bible School, Serkawn chuan April ni 2 atang khan kum 2024-2025 Session atan Class an tan a, kuminah hian zirlai 19 leh Missionary Training mi 5, an vaiin mi 24 an awm a, zirtirtu hi Principal nen mi 6 an awm a, UDC leh IV Grade pakhat ve ve an awm bawk.

April 10, 2024 khan Mizoram Baptist Kohhran chuan kan hma lawka India ram Rorelna sang ber, Loksabha- Inthlanpui lo awm tur atan inthlan thuchah leh ngenna; Kohhran hote leh Political party hrang hrang leh an candidate te hnena ngenna tarlanna thuchah awmna chu a chhuah a, he inthlan thuchah hi General Secretary hminga chhuah ni in, tualchhuang kohhran hrang hranga thawn darh a nih bak ah BCM Website ah dah a ni. Inthlan thuchah ah hian, April ni 13 (inrinni zan) tawngtai inkhawma inthlan lo awm tur atana tualchhung kohhran tin te tawngtai tura ngenna a tel bawk.

April ni 3, 2024 (Nilaini) khan Mizorama Kohhran hrang hrang te inthlun zawmna tur – Council of Churches in Mizoram din tura hmalakna leh din dan tur 'drafting committee' in a duan te thlir-in kohhran hrang hrang aiawh te Synod Office, Aizawl-ah an thukhawm a. BCM aiawhin General Secretary - Rev. R. Lalbiakliana, Rev. R. Lalnunzira, AGS-Service, Rev. R. Lalrintluanga, Executive Secretary, Aizawl, Rev. Vanlalmuankima, Director Pastoral Dept. Rev. Dr. C. Vanlaldika, Principal, AICS, Pu Lalruatkima, Administrative Office,  Upa F. Aizama leh Upa PC Liankhama te an tel a ni.

Mizoram Presbyterian kohhran Pavalai pawl rampum huap inkhawmpui, East Lungdar-a neih na tur atana pandal an sak chu March ni 31, 2024 Pathianni-a thli tlehin a len chhia a.  Mizoram Baptist Mipa Pawl (MBMP) chuan pandal sak ṭhat lehna tur atan hnatlang leh a ṭul anga hman turin inkhawmpui organising committee hnenah cheng sing hnih an pe a ni

April 2, 2024(Thawhlehni)  khan B. Sanghnuna Conference Hall, Christian Hospital Serkawn ah, Medical and Health Department chuan BCM sponsor-a Christian Medical College, Vellore-a MBBS zir tur interview a nei a, mi 47 interview ah hian an inlan a, an vai hian thlan an ni. Heng mi 47 te hian NEET exam-an hmachhawn leh phawt ang a, chuta tling te zing atang chuan Christian Medical College, Vellore in an result azirin MBBS zir tur hi an rawn thlang fel leh dawn a ni.

Ramrikawn, Pangzawl chuan March 31 - April 1, 2024 khan “Lalpa’n thil ropui tak min tih saka, kan lawm hle a ni” tih Sam 126:3 thupuia hmangin an kohhran din champha phak vawi 50-na (Golden Jubilee) an hmang a. General Secretary Rev. R. Lalbiakliana’n he hun hi hmanpuiin Jubilee lungphun a hawng a ni.

April 1 leh ni 2, 2024 (thawhtan leh thawhleh zan) khan Communications department in ram pum huap Fak Lam intihsiak Final chu BCM Hall Serkawn ah neih a ni a, a zan hnihnaah result puangin, lawmman semna neih nghal a ni. Faklam Intihsiakah hian Cental Church, Aizawl chu lam thiam berah thlangin, lawmman pakhatna an dawng a ni.

March 29, 2024 kha Khawvel puma Kristiante ni pawimawh ber te zing ami “Good Friday” a ni a. Good Friday thlen dawn zan (Good Friday eve)-ah Tualchhung Kohhran hrang hrangah Lalpa Zanriah (Sacrament) kilho ani a. Bialtu pastor leh Bial nei lo Minister leh Headquarters-a hruaitute pawh Kohhran hrang hrangah in sem darhin Lalpa Zanriah Sacrament hi an buatsaih a ni. Good Friday zing leh zanah te tualchhung kohhran tinah Pathian biak inkhawm neih a ni.

Tun kar Thawhlehni, March 26, 2024 khan Headquarters Office Committee Room No. 1 ah BCM atanga Kristian Hlabu ennawn Sub.Committee an thukhawm a. Upa C. Hrangdula, Committee Convener-in a kaihruai a, meeting-ah hian member 10 an kal a ni.