July 21-23, 2023 chhung khan ṬKP Lawngtlai South Pastor Bial te chuan “Ngaih hlut tur dik, Lal Isua” tih thupuia hmangin Bial chhunga Unit hrang hrang  intawhkhawm hun an hmang a, Speaker-ah Pu T. Lalrinmuana Lunglei Chanmari hman a ni.

MBKHP hruaitute chuan July 23, 2023 (Pathianni) chawhnu dar 1:30 khan Serkawn Pastor Bial-BKHP te pualin Chhawmdawlna In Awareness an nei a. MBKHP Hruaitute - President  Pi PC Lalvohbiki leh Assistant Secretary Pi V, Biaklawmi leh Grace Society Board member Pi F. Lalthanzami ten hun an hmang  a ni. He hunah hian Bial chhunga Unit hrang hrang atangin member 140 zet an kal khawm a ni.

ṬKP Aizawl East Pastor Bial Hruaitu te chuan kumin a a hnuhnung ber atan July 24, 2023 (Thawhṭanni) zan khan Bial Hruaitu unit tlawh Programme hmangin, ṬKP Electric Unit, Aizawl an tlawh a, hun ṭha tak leh hlawk tak hman a ni.

July 22-23, 2023 chhung khan Bungtlang Pastor Bial BMP te chuan BCM Biak In, Khawnglung-ah  “Tunlai thil awm zia” (Rom 13:11) thupuia hmangin Bial BMP Meet an nei a,  Mizoram BMP Secretary Rev. H. Lalfakzuala chu  Speaker-ah hman a ni. Speaker hi Nl. Lalhlumawii leh Nl. MC Laldingliani Hnahthial ten zaia rawngbawlin an tawiawm.

July 21-23, 2023 chhung khan Kristian Naupang Pawl, Phuaibuang Unit chuan Crusade an nei a, Speaker-ah  Pi Ammie Lalnunpuii, KNP Triner an hmang. KNP ten Pathian thu an ngaithla tha-in an hlim hle a. Pathianni chawhnu-ah Nu leh Pa te pualin Inpawlhona neih a ni

TKP Aizawl East Pastor Bial chuan July 22, 2023 (Inrinni) khan Aizawl Area TKP Coordination Committee ruahmanna in Model Blood Bank, Civil Hospital Aizawlah  thisen pek runpui an nei a. He hunah hian Bial chhung Unit 6 atangin member 88 an kal a, thisen Unit 50 (Mipa 46 leh Hmeichhia 4) an pe a ni.

July 14-16, 2023 chhung khan Lawngtlai Area huamchhunga Bial Zaipawl te pualin intawhkhawmna (Bial Zaipawl Meet) BCM Biak In - Lawngtlai Vengpuiah neih a ni a. Thupuiah "Lalpa lawm tlak, Rawngbawlna" tih hman a ni.

​​​​​​​#Chhipphir Pastor Bial chuan Rev. R. Lalnunzira, AGS-Service speaker-a hmangin July 15 leh 16 hmang khan BCM Biak In, Chhipphir-ah Mission Convention an nei a. #Salem Kohhran, Lunglei chuan July 14-16 chhung khan Rev. Dr. R. Lalthanmawia, AGS-Mission speaker-a hmangin Mission Convention an nei a. Thupui-ah Isaia 6:9 – thu ‘Mi tir ta che” tih hman a ni.

July 16, 2023 (Pathiani) khan Shillong Pastor Bial chuan Sunday school inkhawmpui BCM Biakin, Madanriting-ah an hmang a. Rev F.Ramdinmawia'n inkhawmpui hawnna a nei a, Rev PC Lalnunzira, Regional Director, Guwahati Region in inkhawmpui thupui "Pathian thu nung" tih hmangin thuchah a sawi.

Aizawl Area TKP leh BMP Coordination Committee-in ruahmanna an siam angin,  July 15, 2023 (Inrinni) khan Baptist Multipurpose Centre (BMC), Falkland ah Hnatlang runpui neih a ni a. Aizawl City huam chhung, Pastor  Bial 10 atangin BMP member 102, TKP - Aizawl East Pastor Bial member 87 leh Mission Vengthlang Pastor Bial atangin mi 30 ten hnatlang hi thawkin, hruaitu te nen mi 200 chuang zet an thawk chhuak a ni.

Rahsiveng Pastor Bial TKP chuan kumin atana an hmachhawp "Vantlang tana thil tih (social service) neih ni se" ti-a an dah bawhzuina leh tihhlawhtlin nan July 15, 2023 (Inrinni) khan Higher and Technical Institute, Mizoram (HATIM) campus, Kawmzawl-a Medical Center hmun tur samfai hnatlang an thawk a. Hnatlangah hian ṬKP member 91 thawkchhuakin, HATIM a thawktu ṭhenkhat ten an tawiawm bawk.  Rahsiveng Pastor Bial ah hian TKP Unit 5 - Rahsiveng, Moria (Rahsiveng), Venghlun, Bethel (Venghlun) leh Sazaikawn Unit te awm in, member 1456 an awm a ni.

Mizoram Baptist Kohhran Hmeichhe Pawl hmalakna 'Tlawhkhat Bial tlawh Programme' kal zelah July 15 &16 hmang khan Phawngpui North Pastor Bial tlawhin  MBKHP hruaitute  Rbt.H. Lalkimi, Vice President leh Executive Committee member pahnih Pi F. Lalawmpuii leh Pi K. Darrothangi te an kal a.  Inrinni zan-ah BCM Sentetfiang-ah hun hmangin, Pathianni zingah Bial chhung Kohhran pathum - Peniel Kohhran, Sangau leh Cheural ah te in then darhin hun an hmang a.  Pathianni zanah BCM Pang khua-ah hun an hmang bawk.

The Leprosy Mission, Mizoram hnuaia Chapter 32-na atan TLM, Mizoram - Champhai Chapter chu July 16 (Pathianni)  khan BCM Biak In, Kahrawt, Champhai ah neih a ni a. Upa H. Thanzuala, TLM Mizoram Campaign Secretary-in Inkhawm kaihruaiin, Rev TC Zodinsanga, Executive Secretary, TLM Mizoram in TLM Chapter thar hi hawngin, chapter hruaitu tur te lawmluhna leh Pathian hnena hlanna a nei nghal.

Mizoram Baptist Kohhran Administrative Committee July 20, 2023-a thukhawm chuan, a hnuaia tarlan ang hian contract-a hna thawktu tur a la thar. Hna thawktu lak tharte hian August 1, 2023-ah an hna thar an zawm ang.

BCM Medical & Health Committee Meeting dated 14th July, 2023-a thukhawm chuan  a hnuaia hming tarlante hi Christian Hospital Serkawn-a thawk turin a la.