August 15 khan, kum tina hman thin a nih ang in, Indian Baptist Women’s Union (IBWU) Tawngtai Ni hman a ni a, IBWU Hqrs atanga Tawngtai thupui buatsaih sa angin Unit hrang hranga BKHP member ten IBWU tawngtai Ni hi an hmang.

August 12 (Inrinnni) nilengin Bazar Pastor Bial, Lunglei-ah Bial huap Upa leh Rawngbawltute pualin BCM Biak In, Venglaiah Upa leh Rawngbawltu Seminar an buatsaih a. Resource person-ah Rev. R. Lalnunzira AGS (Service) leh Rev. Vanlalmuanakima, Director, Pastoral Ministry Department an hmang.

August 12, 2023(Inrinni) khan Mizoram Ṭhalai Kristian Pawl Executive Committee Meeting Vawi 543-na chu BCM Lunglawn Committee Hall-ah neih a ni a. Thu pawimawh tam tak relin, kum 2024 ṬKP Ramthimni leh ṬKP Day thupui pawh thlan fel a ni.

Shillong Pastor Bial Rorelna-in Naupang humhalh inzirtirna neih nise ti a rel tih hlawhtlin na atan August 11, 2023 (Zirawtpni) khan BCM Biak In, Madanritingah Naupang humhalh inzirtirna chu neih a ni a.  Resourse person-ah Pi F Lalengmawii, Bial BKHP President hman a ni a, member 29 an kal khawm a ni.

August 10, 2023 (Zirtawpni) khan Baptist Higher Secondary School, Serkawn thawktute chuan KL Rokhuma Hall, Serkawn ah nilengin Retreat Proprgamme an hmang a. Principal, Pu R. Zosangliana’n tanna leh hunserh hmangin Chawhma lamah Vice Principal  Pu R. Vanlalthiana’n Zirna lama hmasawnna tur hrang hrang te leh tan lak an mamawhna te, infuihtharna te neiin, sawihona te neih a ni a. Chawhnu lamah Rev. F. Sangvela hovin thlarau lam intuaitharna an hmang chhunzawm leh a ni.

August 9-11, 2023 khan Savidge English School, Mualthuam North chuan Pu H. Muansangpuia, KNP Trainer Speaker-a hmangin Gospel Meeting an nei a. August 19 (Nilai) zanah zirlai Nu leh Pate pualin, BCM Biak In Mualthuam ‘N’ ah hun hman a ni a. Kohhran hrang hrang atangin zirlai nu leh pa te kalkhawmin, "Fanau enkawl- Naupang thanlennaa chhungkaw pawimawhna" tih thupui-a hmangin Speaker-in thuchah leh fuihna  thu a sawi a, Zirlai naupang ten special Item hmuhnawm tak tak an chhawpchhuak bawk.

August ni 11 (Zirtawpni) khan KNP Unit hrang hrang te puala 'Thuawihna leh Taihmakna Rah' tih thupui hmanga Lemchan Tawi intihsiak chu Top 10 puan a ni a. Lemchan tawi Intihsiakah hian KNP Unit hrang hrang 43 an tel a ni.

Baptist Youth Felowship of India (BYFI) ruahmanna-in August 13, 2023 (Pathianni) tlai dar 5:00 atanga zan dar 10:00 chhung hian India ram pum huapin Baptist Thalai member zawng zawng ten Manipur tan tawngtai an nei dawn a. Mizoram Thalai Kristian Pawl (MTKP) chuan Hun bi tuk chhungah darkar khat theuh Unit tin ten an remchan hun ruatin Biak In-ah emaw hmun ruat bikah emaw tawngtaina hi nei turin unit zawng zawng te an hriattir in an sawm a. Tawngtai thupui tur hrang hrang pakua siamin, thawn chhuah a ni.

“Hmangaihna In” Pathian hnena hlanna Inkhawm hi August 8, 2023 (Thawhlehni) tlai dar 3:00-ah neih a ni a. Pc Lalvohbiki, President – MBKHP-in Inkhawm kaihruaiin, Pi Lalnunzami Chawngthu, Project Manager, Grace Society-in report a pe a.  Rev. R. Lalbiakliana, General Secertary-in Pathian hnena hlanna leh Lawmthusawina a nei a. Nl. Lalhmingmawii Chongthu, MBKHP Secertary-in Lawmthusawiin, Rev. ZD Rodingliana, Director Worship Department-in malsawm tawngtaiin hun a khar a, tlaiah chawhlui kilho nghal a ni.  Hmangaihna In hlanna hunah hian Chhawmdawlna In-a awmte leh thawktute bakah MBKHP hruaitute, BCM Headquarters hruaituten an tel a ni.

August 2 - 4, 2013 khan Baptist Mission School, Damparengpui chuan Pu H. Muansangpuia, KNP Trainer Speaker-a hmangin Gospel Meeting an nei a. Agust  ni 2 zanah Bru Baptist Church Nu leh Pate leh Zirtirtute pualin hun hman phawt a ni a. August 3-4 -ah Gospel Meeting hi nei in, hmun hnih ah neih a ni

Muallianpui Pastor Bial chuan August 4-6 chhung khan Rev. Dr. R. Lalthanmawia, AGS-Mission speaker-a hmangin BCM Biak In, Muallianpui 'S'-ah Mission Convention an nei a. Zirtawp zan atangin Pathianni zan thleng Pathian Biak Inkhawm neih thin a ni a. Speaker thuchah bakah  Kohhran Zaipawl, Group zai leh mimal zaithiam te hnen atang in fakna hla ngaihthlak thin a ni a. Pathianni  chawhnuah Mission Pual-in Inpawlhona neih a ni a. Mission rawngbawlna report te ngaihtla-in zawhna leh chhanna te, sawihona te neih a ni bawk.

BCM Gosen, Lunglei member 5 leh BCM Kahrawt, Champhai member pahnih te chu Rev. Pc Lalropuia, Bialtu Pastor, Champhai Bial hovin  BCM Ngur, Biak In Ceilling siam leh Electric Wirting hna thawkin Work Camp an nei mek

August 5 & 6 (Inrinni leh Pathianni) hmang khan Baptist Mipa Pawl, Champhai Pastor Bial chuan BCM Biak In, North Khawbung-ah ‘Tunlai Thil awmzia leh BMP te” tih thupuia hmangin Bial BMP Intawhkhawmna (BMP Meet) an nei a. Speaker-ah Rev. H. Lalfakzuala, MBMP Secretary an hmang.

August 5, inrinni khan Awareness campaign te hi neih a ni a, Bethel Kohhran Haulawng-ah hian "Naupangte Social Media hman chungchang"  thupuia hmangin zirtirna neih a ni a. Rbt.K.Lalhriatpuia, KNP Trainer-in Awareness hi neihpuiin, Tv. Peter Ramdinzauva'n a tawiawm a. Chawhma leh chawhnu hun-ah thenin  tlai dar 3:30 ah an tin a ni.

Awareness Campaign hi August 4, 2023 (Zirtawpni) khan BCM BIak In, Trinity Zobawk ah an nei a. MBKHP Hruaitute atangin  Executive Commitee Member - Rbt. F. Lalrochami leh Pi C Zonusangi te bak ah Grace Society  Board member Pi Lalluahpuii ten hun an hmang  a, Bial chhunga Unit hrang hrang atangin member 60 an kal khawm a ni.